சாலையோர உணவகங்களில் வீட்டு உபயோக சிலிண்டர்கள்

கும்மிடிப்பூண்டி:தொழில் சம்பந்தமான சமையல் பயன்பாட்டிற்கு, கமர்ஷியல் காஸ் சிலிண்டர்களை மட்டுமே பயன்படுத்த வேண்டும். ஆனால், கும்மிடிப்பூண்டி, கவரைப்பேட்டை, எளாவூர், ஆரம்பாக்கம், மாதர்பாக்கம் ஆகிய பகுதிகளில் உள்ள சாலையோர உணவகங்கள் மற்றும் தள்ளுவண்டி கடைகளில், வீட்டு உபயோக காஸ் சிலிண்டர்கள் பயன்படுத்தப்பட்டு வருகின்றன.தற்போது, 19 கிலோ எடை கொண்ட கமர்ஷியல் காஸ் சிலிண்டர், 1,965 ரூபாய்க்கும், 14.2 கிலோ எடை கொண்ட வீட்டு உபயோக காஸ் சிலிண்டர், 818 ரூபாய்க்கும் விற்கப்படுகிறது. அதன்படி, வீட்டு உபயோக காஸ் சிலிண்டர்களை, மானிய விலையில் அரசு வழங்கி வருகிறது.சராசரியாக, ஒரு கிலோ வீட்டு உபயோக காஸ் விலை, 58 ரூபாய் என்றால், கமர்ஷியல் காஸ் விலை, 103 ரூபாயாக உள்ளது. இதனால், சட்டப்படி மானிய விலையில் வழங்கப்படும் வீட்டு உபயோக சிலிண்டர்களை, தொழிலுக்கு பயன்படுத்த கூடாது.எனவே, கும்மிடிப்பூண்டி வட்ட வழங்கல் துறையினர், சாலையோர கடைகளில் தொடர் சோதனை மேற்கொண்டு, உரிய நடவடிக்கை எடுக்க வேண்டும் என, கும்மிடிப்பூண்டி பகுதிவாசிகள் கோரிக்கை விடுத்துள்ளனர்.