சிதிலமடைந்த 1,500 மேல்நிலை நீர்த்தேக்க தொட்டிகள்...இப்பவோ... எப்பவோ?:குடிநீரின் தரமும் கேள்விக்குறியால் மக்களுக்கு ஆபத்து

திருவள்ளூர்: திருவள்ளூர் மாவட்டத்தில் 14 ஒன்றியங்களில், 1,500க்கும் மேற்பட்ட மேல்நிலை நீர்த்தேக்க தொட்டிகள் சேதமடைந்து, இடிந்து விழும் அபாய நிலையில் உள்ளன. மத்திய அரசின் ஜல் ஜீவன் திட்டத்தின் கீழ், 2019 - 2025 வரை 800 மேல்நிலை நீர்த்தேக்க தொட்டிகள் கட்டப்பட்டும், நான்கு ஆண்டுகளாக பயன்பாட்டிற்கு வராமல் வீணாகி வருகின்றன. திருவள்ளூர் மாவட்டத்தில் உள்ள 14 ஒன்றியங்களில், 526 ஊராட்சிகள் உள்ளன. இங்கு, மக்கள் தொகைக்கு ஏற்ப 10,000 - 2 லட்சம் லிட்டர் வரை, 4,500க்கும் மேற்பட்ட மேல்நிலை நீர்த்தேக்க தொட்டிகள் அமைக்கப்பட்டுள்ளன. இந்த குடிநீர் தொட்டிகளுக்கு ஆழ்துளை கிணறு அமைக்கப்பட்டு, அதன் மூலம் குடிநீர் வினியோகம் செய்யப்பட்டு வருகிறது. கடந்த 20 ஆண்டுகளுக்கு முன் அமைக்கப்பட்ட மேல்நிலை நீர்த்தேக்க தொட்டிகளை முறையாக பராமரிப்பதில்லை. இதனால், 1,500க்கும் மேற்பட்ட நீர்த்தேக்க தொட்டிகள் மிகவும் சேதமடைந்து, இடிந்து விழும் அபாய நிலையில் உள்ளன. இந்த மேல்நிலை நீர்த்தேக்க தொட்டிகளை முறையாக சுத்தம் செய்வதில்லை. மேலும், குளோரினேஷன் செய்யப்படாமல் குடிநீர் வழங்கப்படுகிறது. சில கிராமங்களில் வினியோகிக்கப்படும் குடிநீர் துர்நாற்றம் வீசுவதால், அப்பகுதி மக்கள் தொற்று நோய் பரவும் அபாயத்தில் உள்ளனர். பலமுறை புகார் அளித்தும் சம்பந்தப்பட்ட துறை அதிகாரிகள் எவ்வித நடவடிக்கையும் எடுக்கவில்லை என, அப்பகுதி மக்கள் குற்றஞ்சாட்டி வருகின்றனர். இந்நிலையில், திருவள்ளூர் மாவட்டம் முழுதும் உள்ள 14 ஒன்றியங்களில் தேர்ந்தெடுக்கப்பட்ட ஊராட்சிகளில், மத்திய அரசின் ஜல் ஜீவன் திட்டத்தின் கீழ், 2019 - 2025ம் ஆண்டு வரை, 800 புதிய மேல்நிலை நீர்த்தேக்க தொட்டிகள் கட்டப்பட்டுள்ளன. ஊராட்சிகளில் மக்கள் தொகைக்கு ஏற்ப 20,000 லிட்டர் முதல் 60,000 லிட்டர் வரை நீர்த்தேக்க தொட்டிகள் கட்டப்பட்டுள்ளன. இந்த குடிநீர் தொட்டிகள் கட்டப்பட்டு நான்கு ஆண்டுகளாகியும், தற்போது வரை பயன்பாட்டிற்கு வராமல் காட்சிப்பொருளாக மாறியுள்ளது. குடிநீர் தொட்டி அமைக்கப்பட்டுள்ள ஊராட்சிகளில், தற்போது வரை வீடுகளுக்கு குழாய் பொருத்தும் பணி நிறைவடையாமல் கிடப்பில் போடப்பட்டுள்ளதே இதற்கு காரணம் என, ஊராட்சி செயலர்கள் குற்றஞ்சாட்டுகின்றனர். எனவே, ஏதேனும் அசம்பாவிதம் நிகழும் முன் மோசமான நிலையில் உள்ள மேல்நிலை நீர்த்தேக்க தொட்டிகளை அகற்றிவிட்டு, புதிதாக கட்டப்பட்ட நீர்த்தேக்க தொட்டிகளை பயன்பாட்டிற்கு கொண்டுவர, மாவட்ட நிர்வாகம் நடவடிக்கை எடுக்க வேண்டும் என, அப்பகுதி மக்கள் கோரிக்கை விடுத்துள்ளனர்.

விரைவில்

வினியோகம்

கடம்பத்துார் ஒன்றியத்தைச் சேர்ந்த ஊராட்சி செயலர்கள் கூறியதாவது: கடம்பத்துார் ஒன்றியத்தில் கல்லம்பேடு, இலுப்பூர், வெள்ளேரிதாங்கல், அதிகத்துார், முதுகூர் ஆகிய ஊராட்சிகளில், தலா 1 கோடி ரூபாய் மதிப்பில், ஜல் ஜீவன் திட்டத்தில் மேல்நிலை நீர்த்தேக்க தொட்டி கட்டப்பட்டு, குடிநீர் வினியோகம் செய்யப்படாமல் உள்ளது. இதற்கு காரணம், வீடுகளுக்கு குடிநீர் குழாய் பொருத்தும் பணி நடந்து வருகிறது. விரைவில் வீடுகளுக்கு குழாய் இணைப்பு வழங்கி குடிநீர் வினியோகிக்கப்படும். இவ்வாறு அவர்கள் கூறினர். ஜல் ஜீவன் திட்டத்தில் கட்டிய குடிநீர் தொட்டிகள் கொள்ளளவு எண்ணிக்கை 20,000 லிட்டர் 275 30,000 லிட்டர் 225 40,000 லிட்டர் 190 60,000 லிட்டர் 110 மொத்தம் 800

கணக்கெடுப்பு பணி நடக்கிறது

ஊரக வளர்ச்சித் துறை அதிகாரி கூறியதாவது: திருவள்ளூர் மாவட்டத்தில் சேதமடைந்துள்ள மேல்நிலை நீர்த்தேக்க தொட்டிகள் குறித்து, மாவட்ட நிர்வாகத்திற்கு தெரிவித்துள்ளோம். மாவட்ட நிர்வாகம் உத்தரவுக்கு பின் இடித்து அகற்றப்படும். தற்போது, குடிநீர் இணைப்பு வழங்காத வீடுகள் குறித்து கணக்கெடுத்து வருகிறோம். விரைவில் இணைப்பு வழங்கி, குடிநீர் சீராக வழங்கப்படும். ஜல் ஜீவன் திட்டத்தில் கட்டப்பட்ட மேல்நிலை நீர்த்தேக்க தொட்டிகளை பயன்பாட்டிற்கு கொண்டுவர நடவடிக்கை எடுக்கப்படும். இவ்வாறு அவர் கூறினார்.