ஜி.என்.டி., சாலை நடுவே மீடியனை மாற்ற கோரிக்கை

கும்மிடிப்பூண்டி:கும்மிடிப்பூண்டி ஜி.என்.டி., சாலையில், மூன்று கிலோமீட்டர் தொலைவிற்கு பஜார் பகுதி அமைந்துள்ளது. இச்சாலையில், 20 ஆண்டுகளுக்கு முன், மூன்று அடி உயர மீடியன் அமைக்கப்பட்டது. அப்போது, சாலையின் அகலத்தை கணக்கிடாமல், மீடியன் அமைக்கப்பட்டதாக கூறப்படுகிறது.அதன்பின், ஜி.என்.டி., சாலையின் இருபுறமும் எல்லை நிர்ணயித்து, கால்வாய் அமைக்கப்பட்டன. தற்போது, ஒரு பக்க கால்வாய், மீடியனில் இருந்து, 30 - 40 அடி துாரத்திலும், மறுபுற கால்வாய், மீடியனில் இருந்து, 60 - 100 அடி துாரம் வரை உள்ளது.இதனால், 40 அடி அகலம் உள்ள சாலையில், ஆக்கிரமிப்பு கடைகள் போக மீதமுள்ள சாலையில் வாகனங்கள் சென்று வருகின்றன. பரபரப்பான காலை - மாலை நேரங்களில், 40 அடி சாலையில் கடும் போக்குவரத்து நெரிசல் ஏற்பட்டு வாகனங்கள் ஸ்தம்பிக்கின்றன.மாநில நெடுஞ்சாலை துறையினர், கும்மிடிப்பூண்டி ஜி.என்.டி., சாலையோரம், இருபுறம் உள்ள கால்வாய்களின் மையப்பகுதியை கணக்கிட்டு, மீடியனை மாற்றி அமைக்க வேண்டும்.அவ்வாறு அமைக்கும் பட்சத்தில், கும்மிடிப்பூண்டி பஜார் பகுதியில் போக்குவரத்து நெரிசலுக்கு தீர்வு கிடைக்கும் என, பகுதிவாசிகள் கோரிக்கை விடுத்துள்ளனர்.