மணல் கடத்திய லாரி பறிமுதல்

திருவள்ளூர்:திருவள்ளூர் மாவட்ட கனிமவள துறையினர் நேற்று முன்தினம் திருத்தணி-திருவள்ளூர் தேசிய நெடுஞ்சாலையில் பாண்டூர் அருகில் வாகன சோதனையில் ஈடுபட்டனர். அப்போது, ஆந்திர மாநில பதிவு எண் கொண்ட அசோக் லைலண்ட் லாரியை நிறுத்திய போது, அதன் ஓட்டுனர் லாரியை நிறுத்தி விட்டு தப்பியோடி விட்டார்.லாரியில் சோதனை செய்த போது, 8 யூனிட் ஆற்று மணல் இருந்தது. இதையடுத்து கனிமள துறை உதவி புவியிலாளர் பாலாஜி லாரியை பறிமுதல் செய்து, திருவள்ளூர் தாலுகா காவல் நிலையத்தில் ஒப்படைத்தார். போலீசார் வழக்கு பதிந்து, லாரி உரிமையாளர் மற்றும் ஓட்டுனரை தேடி வருகின்றனர்.* இதே போல் கும்மிடிப்பூண்டி புறவழிச்சாலையில் போலீசார் நேற்று வாகன தணிக்கை செய்தனர். அப்போது, உரிய அனுமதியின்றி மணல் கடத்தி வந்த டிராக்டரை பறிமுதல் செய்தனர்.ஓட்டுனரான கும்மிடிப்பூண்டி அடுத்த ராஜாபாளையம் கிராமத்தை சேர்ந்த சபாபதி, 34, என்பவரை கைது செய்தனர்.