ஏற்றுமதியாளர்கள் எதிர்நீச்சல்

திருப்பூரில் இருந்து, கடந்த ஏப்., முதல் செப்., வரையிலான ஆறு மாதங்களில், 21 ஆயிரத்து, 137 கோடி ரூபாய்க்கு, பின்னலாடை ஏற்றுமதி நடந்துள்ளது; இது, முந்தைய ஆண்டை காட்டிலும், 1,875 கோடி ரூபாய் அதிகரித்துள்ளது. நாட்டின் ஏற்றுமதி வர்த்தகத்தில் முக்கிய இடம்பெறுகிறது, ஜவுளி ஏற்றுமதி; குறிப்பாக, ஆயத்த ஆடை ஏற்றுமதியால், அதிக அளவு அன்னிய செலாவணி ஈட்டப்படுகிறது. இந்தியாவின் மொத்த ஆயத்த ஆடை ஏற்றுமதியில், 51 சதவீதம் பின்னலாடைகள் பங்கு பெறுகின்றன. ரூ.34,651 கோடி ஏற்றுமதி நாட்டின், ஒட்டுமொத்த பின்னலாடை ஏற்றுமதியில், திருப்பூர் 61 சதவீத பங்களிப்புடன் முன்னோடியாக உள்ளது. நடப்பு நிதியாண்டில், ஏப்., முதல் செப்., வரையிலான, ஆறு மாதங்களில், 34 ஆயிரத்து, 651 கோடி ரூபாய்க்கு பின்னலாடை ஏற்றுமதி நடந்துள்ளதாக, மத்திய வர்த்தகத்துறை அமைச்சக தகவல்கள் தெரிவிக்கின்றன. திருப்பூரில் இருந்து மட்டும், 21 ஆயிரத்து, 137 கோடிக்கு ஏற்றுமதியாகியுள்ளது. கடந்த நிதியாண்டின்(2024-25), முதல் ஆறு மாதங்களுடன் (ஏப்., -செப்.,) ஒப்பிடுகையில், 2,958 கோடி ரூபாய் அளவுக்கு ஒட்டுமொத்த பின்னலாடை ஏற்றுமதி அதிகரித்துள்ளது; திருப்பூரின் ஏற்றுமதியும், 1,875 கோடி ரூபாய் அதிகரித்துள்ளது. அமெரிக்க வரி உயர்வு அமெரிக்க வரி உயர்வு காரணமாக, ஆக., மாதத்துக்கு பிறகு, அந்நாட்டுக்கான ஏற்றுமதி குறைந்தது. அதன்படி, பின்னலாடை ஏற்றுமதியும், கடந்தாண்டு செப்., மாதத்தை காட்டிலும், கடந்த செப்., மாதம், 141 கோடி ரூபாய் குறைந்துள்ளது. இருப்பினும், அதிகபட்ச தள்ளுபடி சலுகை அளித்து, அமெரிக்க வர்த்தகத்தை கடந்த சில மாதங்களாக தொடர்ந்து வருகின்றனர். மத்திய அரசின் புதிய நிவாரண திட்ட அறிவிப்பு நடைமுறைக்கு வரும் போது, பாதிப்பை சமாளித்து வர்த்தகத்தை தொடர முடியும் என்கின்றனர் ஏற்றுமதியாளர்கள். சரிவு வராமல் ஈடுகட்டலாம் அமெரிக்க வரி உயர்வு கடினமாக இருந்தாலும், அப்போதைய சீசன் ஆர்டர்களை முடிக்க, அதிக தள்ளுபடி வழங்கி, வர்த்தகத்தை தொடர்கிறோம். தொடர்ந்து, அவ்வாறு தள்ளுபடி வழங்க முடியாது என்பதை உணர்ந்து, மத்திய அரசும், நிவாரண அறிவிப்புகளை வெளியிட்டுள்ளது. அவசரகால திட்ட அறிவிப்புகள், முழுமையாக நடைமுறைக்கு வரும் போதும், வட்டி சமன்படுத்தும் திட்டத்தை நீட்டித்து, நிலுவையை விடுவிப்பது பெரிய நிவாரணமாக இருக்கும். எப்படியிருந்தாலும், நடப்பு நிதியாண்டின் ஏற்றுமதி வர்த்தகத்தை, சரிவு வராமல் ஈடுகட்ட முடியும். சுப்பிரமணியன், தலைவர், திருப்பூர் ஏற்றுமதியாளர் சங்கம்.