குளிர்கால பின்னலாடை விற்பனை அதிகரிப்பு

திருப்பூர்: வங்கதேச ஆடை வரத்து குறைந்ததால், உள்நாட்டு சந்தைகளில், குளிர்கால ஆடை விற்பனை அதிகரித்துள்ளது. வரும் கிறிஸ்துமஸ் பண்டிகைக்கு பிறகு, கோடைக்கால ஆர்டர் மீதான உற்பத்தியை துவக்க, திருப்பூர் உற்பத்தியாளர்கள் தயாராகி வருகின்றனர். இந்தியா - வங்கதேசம் இடையே, வரியில்லா வர்த்தக ஒப்பந்தம் நடைமுறையில் உள்ளது; இருப்பினும், அந்நாட்டில் இருந்து ஆடை இறக்குமதி செய்ய கட்டுப்பாடுகள் இருந்தன; ஜி.எஸ்.டி. அமலுக்கு வந்த பின், கட்டுப்பாட்டு வரிகள் நீக்கப்பட்டன; இதனால், 2018 முதல், வங்கதேச ஆடை இறக்குமதி அதிகரித்தது. இது, உள்நாட்டு சந்தைகளையும், உற்பத்தியாளர்களையும் பாதித்தது. ஏற்றுமதியாளர்கள், சர்வதேச சந்தைகளில், பல்வேறு நாடுகளை சேர்ந்த வர்த்தகர்களுடன் போட்டியிட வேண்டியுள்ளது. அதேபோல், உள்நாட்டு ஆடை உற்பத்தியாளர்கள், உள்ளூர் சந்தையில், வங்கதேச ஆடைகளின் போட்டியை சமாளிக்க வேண்டிய நிர்பந்தம் ஏற்பட்டது; உள்நாட்டு சந்தை வாய்ப்புகள் வேகம் குறைந்தன. வங்கதேச ஆடைக்கு தடை வங்கதேசத்தில், உள்நாட்டு குழப்பம் ஏற்பட்ட பிறகு, தரைவழி போக்குவரத்து வழியாக நடந்து வந்த ஆடை இறக்குமதிக்கு தடை விதிக்கப்பட்டது; இது, உள்நாட்டு சந்தைகளில் நிலவிய குழப்பத்தை தீர்த்து வைத்தது. அதன் பிறகுதான், 2024 முதல், உள்நாட்டு சந்தைகள் மீண்டு வந்துள்ளன. தீபாவளி பண்டிகைக்கால ஆர்டர், முன்பு இல்லாத அளவுக்கு, பல்வேறு மாநிலங்களில் இருந்தும் குவிந்தது; தொடர்ந்து, குளிர்கால ஆடை ஆர்டர்களும் வந்தன. மழை மற்றும் பனி காலங்களில் அணிவது போன்ற, பின்னலாடை விற்பனை, நாடு முழுவதும் கணிசமாக உயர்ந்தது. வரும் கிறிஸ்துமஸ் பண்டிகையுடன், குளிர்கால ஆர்டர் மீதான உற்பத்தி முடியும்; சில்லரை விற்பனை, பிப்., மாத இறுதி வரை நடைபெறும். அடுத்த மாதத்தில் இருந்து, கோடைக்கால ஆர்டர் மீதான உற்பத்தியை துவக்க, ஒட்டுமொத்த திருப்பூர் பின்னலாடை உற்பத்தியாளர்கள் தயாராகி வருகின்றனர். கோடைக்கால ஆர்டர்கள் 15 சதவீதம் அதிகரிக்கும் திருப்பூர் பின்னலாடை உற்பத்தியாளர்கள் கூறுகையில்,''தீபாவளி பண்டிகைக்கு பிறகு, பெரிய உற்பத்தி ஆர்டர்கள் கிடைக்காது; இருப்பினும், இந்தாண்டு சில ஆர்டர்கள் வந்து கொண்டிருக்கின்றன. 'ஸ்வெட்டர்' போன்ற குளிர்கால ஆடைக்கு, நாடு முழுவதும் வரவேற்பு அதிகரித்துள்ளது. இதனால், கடந்த இரண்டு ஆண்டுகளாக, குளிர்கால ஆர்டர்களும், உள்நாட்டு உற்பத்தியாளருக்கு கிடைக்கிறது. கோடைகால ஆர்டர் தான் திருப்பூருக்கு பிரதானமானது. கிறிஸ்துமஸ் பண்டிகை முடிந்து, ஜன., முதல் கோடைக்கால ஆர்டர் மீதான உற்பத்தியை துவக்க தயாராகி வருகினறனர்; கோடைக்கால ஆர்டர்களும், முந்தைய ஆண்டை காட்டிலும், 15 சதவீதம் வரை அதிகரிக்கவும் வாய்ப்புள்ளது,' என்றனர்.