வீடூர் அணையிலிருந்து உபரி நீர் வெளியேற்றம் கரையோர மக்களுக்கு எச்சரிக்கை

விக்கிரவாண்டி: 'டிட்வா' புயல் மழை காரணமாக வீடூர் அணைக்கு நீர் வரத்து இருப்பதால் அணையிலிருந்து உபரி நீர் வெளியேற்றப்படுகிறது. விக்கிரவாண்டி அடுத்த வீடூர் அணை நீர் பிடிப்பு பகுதிகளில் கன மழை காரணமாக நீர்வரத்து அதிகரித்து கடந்த மாதம் 22ம் தேதி அணையின் முழு கொள்ளளவான 32 அடியில் ( 605 மில்லியன் கன அடி) 31.100 அடியை (534.528 மில்லியன் கன அடி) எட்டியது. இதையடுத்து கடந்த 19ம் தேதி முதல் அணையிலிருந்து பாசனத்திற்கு தண்ணீர் கால்வாயில் தினமும் 40 கன அடி தண்ணீரை திறந்து விட்டனர். இந்நிலையில் 'டிட்வா' புயல் காரணமாக விழுப்புரம் மாவட்டத்தில் தற்போது கன மழை பெய்து வருகிறது. கன மழை பெய்யும் என வானிலை ஆய்வு மையம் எச்சரிக்கை விடுத்துள்ளது. இந்நிலையில் நேற்று பிற்பகல் அணையின் மொத்த கொள்ளவில் 29.00 அடி (391.384 மில்லியன் கன அடி) நீர் இருப்பு இருந்தது. மழை காரணமாக பிற்பகல் 3:00 மணியிலிருந்து அணைக்கு வினாடிக்கு 640 கன அடி தண்ணீர் வரத்து வரத் தொடங்கியது. இதையடுத்து அணையின் பாதுகாப்பு கருதி 600 கன அடி உபரி நீரை ஒரு மதகை திறந்து வெளியேற்றினர். பொதுப்பணித்துறை செயற்பொறியாளர் அருணகிரி தலைமையில் உதவி செயற்பொறியாளர் அய்யப்பன், உதவி பொறியாளர் பாபு ஆகியோர் அணையில் முகாமிட்டு நீர் வரத்தை தொடர்ந்து கண்காணித்து வருகின்றனர். இரவு நேரத்தில் அதிகனமழை பெய்து நீர்வரத்து அதிகரித்தால் அதற்கேற்றாற்போல் அணையிலிருந்து கூடுதல் மதகுகளை திறந்து உபரி நீரை வெளியேற்ற உள்ளனர். இதனால் கரையோர பகுதிகளில் வசிக்கும் மக்களுக்கு எச்சரிக்கை விடுத்துள்ளனர்.