ஆன்லைன் மோசடி: 12 பேர் கைது

சென்னை:'ஆன்லைன்' வாயிலாக, டாக்டர் உள்ளிட்டோரிடம் கோடிக்கணக்கில் மோசடி செய்த, இரண்டு பெண்கள் உட்பட, 12 பேர் கைது செய்யப்பட்டு உள்ளனர்.மாநில சைபர் குற்றப்பிரிவு தலைமையக கூடுதல் டி.ஜி.பி., சந்தீப் மிட்டல் தலைமையிலான போலீசார், சென்னை, தஞ்சாவூர், வேலுார் மாவட்டங்களில் பதிவான, ஆன்லைன் மோசடி புகார்கள் குறித்து விசாரித்தனர். 'ஆன்லைன்' முதலீடு தொடர்பாக, 'பேஸ்புக்'கில் விளம்பரம் செய்து, சென்னையை சேர்ந்த டாக்டர் ஒருவரிடம், 87.92 லட்சம் ரூபாய் மோசடி செய்த, சென்னை வளசரவாக்கத்தை சேர்ந்த சகாபுதீன்,44; கடலுார் மாவட்டம் சிதம்பரத்தை சேர்ந்த சாதிக் அப்ரிடி,27; பாத்திமா,45; ராமநாதபுரம் மாவட்டம் கீழக்கரையை சேர்ந்த முஸ்தக் அகமது, 24; சென்னை கே.கே.நகரை சேர்ந்த முகமது உஸ்மான், 67; ஜமிலத் நசீரா,34 உட்பட, எட்டு பேரை நேற்று கைது செய்தனர்.அவர்களிடம் இருந்து, எட்டு மொபைல் போன்கள், 12 சிம்கார்டுகள், லேப்டாப் உள்ளிட்டவை பறிமுதல் செய்யப்பட்டன. அதேபோல, தஞ்சாவூர் மாவட்டத்தை சேர்ந்த நபருக்கு, உதவித்தொகை பெற்று தருவதாகக் கூறி, பண மோசடியில் ஈடுபட்ட டில்லியை சேர்ந்த அசுகுமார்,29; சுபம் குமார், 22; அனுஜ்குமார், 21, ஆகியோரை நேற்று முன் தினம் கைது செய்தனர்.வேலுாரை சேர்ந்த நபரிடம் மும்பை போலீஸ் போல நடித்து, அவரை தனிமைப்படுத்தி ஹோட்டலில் தங்க வைத்து, டிஜிட்டல் கைது செய்து, 2.72 கோடி ரூபாய் மோசடி செய்தது தொடர்பாக, கேரள மாநிலத்தை சேர்ந்த இம்தியாஸ் ஷா,45, என்பவரை கைது செய்தனர். இவர், தன் மனைவி மஞ்சு பெயரில் வங்கி கணக்கு துவங்கி, மோசடி செய்த தொகையில், 1.30 கோடி ரூபாயை எடுத்தது தெரியவந்தது. இந்த வங்கி கணக்கு, இந்தியாவின் பல மாநிலங்களில் ஆன்லைன் வாயிலான மோசடிக்கு பயன்படுத்தப்பட்டு இருப்பதும், 99 புகார்களில் பதிவாகி இருப்பதும், விசாரணையில் தெரிய வந்துள்ளது.