திருப்பதியில் தனுஷ் வழிபாடு : மகனை நடிகராக்குகிறாரா...

நடிகர் தனுஷ் தமிழ், தெலுங்கு, ஹிந்தி ஆகிய மொழி படங்களில் நடித்து பிஸியான நடிகராக வலம் வருகிறார். நடிப்பு தாண்டி இயக்கம், தயாரிப்பு, பாடலாசிரியர், பாடகர் என பன்முகத்திறன் கொண்டவராக உள்ளார். இவருக்கு யாத்ரா, லிங்கா என இரு மகன்கள் உள்ளனர். தனுஷ் தனது மகன்களுடன் திருப்பதியில் பெருமாளை வழிபாடு செய்தார். உடன் அவரது குடும்பத்தினரான அப்பா, அம்மா, சகோதரிகள் உள்ளிட்ட குடும்பத்தினரும் சாமி தரிசனம் செய்தனர். தனுஷின் 55வது பட அறிவிப்பு இன்று மாலை வெளியாகிறது. இதை தனுஷும் இணைந்து தயாரிக்கிறார் என்பது குறிப்பிடத்தக்கது.

இதனிடையே தனுஷ் தனது மூத்த மகன் யாத்ராவை கதாநாயகனாக அறிமுகப்படுத்த திட்டமிட்டுள்ளாராம். இதை தனுஷ் இயக்கி, தயாரிக்கவுள்ளார் என தகவல் வெளியானது. இதுபற்றி விசாரித்தபோது, இப்போதைக்கு அப்படி ஒரு எண்ணம் இல்லை. தனுஷ் தொடர்ச்சியாக இரண்டு, மூன்று படங்கள் கைவசம் வைத்துள்ளார் என்றனர். அதேசமயம் யாத்ரா நடிப்பு, நடனம் போன்ற சினிமா சார்ந்த விஷயங்களை கற்று வருகிறாராம். இன்னும் ஓரிரு ஆண்டுகள் கழித்து மகனை களமிறக்கலாம் என்கின்றனர்.