தயாரிப்பாளர்கள் ஸ்கிரிப்டை படிக்க வேண்டும் : விஜய் சேதுபதி அட்வைஸ்

பிரதீப் ரங்கநாதனிடம் உதவி இயக்குநராக பணிப்புரிந்த மரியா இளஞ்செழியன் இயக்கத்தில், ஜி.வி. பிரகாஷ், கவுரி பிரியா நடித்திருக்கும் படம் 'ஹேப்பி ராஜ்'. பியாண்ட் பிக்சர்ஸ் தயாரித்திருக்கும் இப்படம் வருகிற 27ம் தேதி வெளியாக இருக்கிறது. இப்படத்தின் அறிமுக விழா நடந்தது. இதில் விஜய்சேதுபதி சிறப்பு விருந்தினராக கலந்து கொண்டு பேசியது வைரலானது.

படத்தை தயாரிக்கும் முன்பு தயாரிப்பாளர் ஸ்கிரிப்டை படிக்க வேண்டும் என்று அவர் கேட்டுக் கொண்டுள்ளார். அவர் மேலும் பேசியிருப்பதாவது: தயாரிப்பாளர் சங்க தேர்தலில் வெற்றி பெற்ற தமிழ்குமரன் அவரது அணிக்கும் என்னுடைய வாழ்த்துகள். என்னையும் தயாரிப்பாளர்கள் சங்க தேர்தலில் போட்டியிட சொன்னார்கள். எனக்கு இதெல்லாம் செட்டாகாது என்று சொல்லிவிட்டேன். படத்தில் ஏதாவது பஞ்சாயத்து என்று உட்கார்ந்து, அதற்கு நான் தீர்ப்பு வழங்கி, பிறகு எனது படத்துக்கு ஏதாவது வெச்சி செய்துவிடுவார்களோ என்ற பயம்தான் அதற்கு காரணம்.

சினிமா மிகவும் அற்புதமான தொழில். எப்படி நடிகரோ, இயக்குநரோ சினிமாவை படிக்கிறார்களோ, அதேபோல் தயாரிப்பாளர்கள் வியாபாரத்தையும், ஸ்க்ரிப்ட்டையும் படித்தால் நன்றாக இருக்கும். படியுங்கள், நிறைய படம் பண்ணுங்கள். படத்தின் டிரைலர் மிக ஜாலியாக, சுவாரஸ்யமாக இருந்தது. ஜிவி எப்போதுமே ஸ்கூல் பையனாக நடிக்கலாம் . 90ஸ், ஜென் ஸீ, இன்னும் 50 வருடம் கழித்து எடுத்தால் கூட ஸ்கூல் பையனாக நடிப்பார் என்றார்.