சர்வைவர் யுத்தம்... வெல்லப்போது யார்? - களத்தில் 16 போட்டியாளர்கள்...!

உலகளவில் புகழ்பெற்ற ரியாலிட்டி ஷோவான ‛சர்வைவர் நிகழ்ச்சி முதன்முறையாக ஜீ தமிழ் தொலைக்காட்சியில் ஒளிபரப்பாகிறது. செப்., 12 முதல் ஆரம்பமான இந்த நிகழ்ச்சி தினமும் இரவு 9.30 மணிக்கு ஒளிபரப்பாகி வருகிறது. நடிகர் அர்ஜூன் முதன் முறையாக இந்நிகழ்ச்சி மூலம் டிவியில் தொகுப்பாளராக களமிறங்கி உள்ளார். ஆப்பிரிக்காவில் உள்ள ஜான்சிபர் தீவில் இந்த போட்டி நடைபெற்று வருகிறது.

நிகழ்ச்சியின் முதல்நாள் போட்டியாளர்கள் அறிமுகம் என போனது. அன்றே காடர்கள், வேடர்கள் என போட்டியாளர்கள் இரு அணியினராக பிரிக்கப்பட்டனர். இரண்டாவது நாள் முதலே போட்டிக்கான கடுமையான சவால்கள் துவங்கிவிட்டன. குறிப்பாக அவர்களுக்கான அடிப்படை தேவைக்கான சவால்கள் நடந்தன. தொடர்ந்து ஒவ்வொரு நாளும் ஒவ்வொரு விதமான சவால்கள் கொடுக்கப்பட்டு வருகின்றன. கூடவே சண்டை, சச்சரவுகள் துவங்கி உள்ளன. போக போக போட்டிகள் கடுமையாக நடக்கும் என தெரிகிறது.

இதுதவிர வாரம் ஒருவர் நிகழ்ச்சியில் இருந்து வெளியேறுவர். அது யார் என்பதை போட்டியாளர்களே ஓட்டு போட்டு தீர்மானிப்பர். மொத்தம் 90 நாட்கள் நடக்கின்றன. அனைத்து சவால்களையும் எதிர்கொண்டு யார் இறுதிவரை போட்டியில் தாக்கு பிடிக்கிறார்களோ அவர்களே இந்த நிகழ்ச்சியின் வெற்றியாளர் ஆவார். அவருக்கு ரூ.1 கோடி பரிசு காத்திருக்கிறது.