சந்திரகிரஹணம்; கோவில்களில் நடை அடைப்பு.. 8ம் தேதி காலை பூஜைகள் நடக்கும்

திருப்பூர்; சந்திரகிரஹணம் காரணமாக, நாளை மதியம் நடைசாத்தப்படுமென, பல்வேறு கோவில்களில் அறிவிப்பு செய்யப்பட்டுள்ளது.ஒவ்வொரு மாதமும், அமாவாசை, பவுர்ணமி நாட்களில், கோவில்களில் சிறப்பு பூஜைகள் நடந்து வருகிறது. குறிப்பாக, பவுர்ணமி பூஜைகள், மாலை துவங்கி இரவு, 9:00 மணி வரை நடப்பது வழக்கம். நாளை பவுர்ணமியின் போது, சந்திரகிரஹணம் ஏற்படுகிறது. நாளை பவுர்ணமி என்பதால், இரவு, 9:57 மணிக்கு துவங்கி, அதிகாலை, 1:26 மணி வரை கிரஹணம் ஏற்படுகிறது. முழு சந்திரகிரஹணம் என்பதால், பவுர்ணமி நாளில், இரவு இருள்சூழ்ந்து காணப்படும். இதன் காரணமாக, நாளை, உச்சிகால பூஜைகள் நிறைவு பெற்றதும் கோவில் நடை அடைக்கப்படும்; மாலை மற்றும் இரவுநேர பூஜைகள் இருக்காது. மாலை பவுர்ணமி பூஜை நடத்த வேண்டிய கோவில்களில், மதியத்துக்கு முன்னதாகவே நடத்திட அறிவுறுத்தப்பட்டுள்ளது. வரும், 8ம் தேதி காலை நடைதிறந்து, வழக்கமான பூஜைகள் துவங்குமென, சிவாச்சாரியார்கள் தெரிவித்துள்ளனர். சிவாலயங்களில், தினமும் இரவு 8:30 மணிக்கு நடக்கும், அர்த்தசாம பூஜையை, நாளை மதியமே நடத்த முடிவு செய்யப்பட்டுள்ளதாக, சிவாச்சாரியார்கள் தெரிவித்தனர். இதேபோல், அவிநாசிலிங்கேஸ்வரர் கோவிலில், சந்திர கிரஹணத்தை முன்னிட்டு, நாளை மதியம், 2:00 மணிக்கு நடை அடைக்கப்பட்டு, மீண்டும், 8ம் தேதி காலை, சுத்த புண்யாகவாசனை செய்து, கோவில் முழுவதும் சுத்தம் செய்யப்பட்டு, பூஜைகள் நடக்குமென, கோவில் நிர்வாகத்தினர் அறிவித்துள்ளனர். மாவட்டத்திலுள்ள அனைத்து கோவில்களிலும், இதே நடைமுறை பின்பற்றப்படுவதாக, ஹிந்து அறநிலையத்துறையினர் தெரிவித்தனர்.