சாயல்குடி மீனாட்சி கோயிலில் திருக்கல்யாண உற்ஸவம்

சாயல்குடி: சாயல்குடியில் ராமநாதபுரம் சமஸ்தானத்திற்கு பாத்தியப்பட்ட பழமை வாய்ந்த கைலாசநாதர் சமேத மீனாட்சி அம்மன் கோயில் உள்ளது. இங்கு இன்று திருக்கல்யாண உற்ஸவம், கோலாகலமாக கொண்டாடப்பட்டது. மூலவர்களுக்கு நாள்தோறும் சிறப்பு அபிஷேக அலங்கார தீபாராதனைகள் நடந்தது. கடந்த 10 நாட்களுக்கு முன்பு காப்பு கட்டுதலுடன் விழா துவங்கியது. திருமண பத்திரிகை அச்சடித்து நகர் பகுதி முழுவதும் விழா குழுவினர் வழங்கினர். இன்று காலை 9:30 மணிக்கு மீனாட்சி அம்மன் மற்றும் கைலாசநாதருக்கு திருக்கல்யாண உற்ஸவம் நடந்தது. கோயில் அர்ச்சகர் மங்கள நாண் மீனாட்சி அம்மன் கழுத்தில் பூட்டினார். பக்தர்களின் மீது அட்சதை தூவப்பட்டது. அன்னதானம் வழங்கப்பட்டது. விழா ஏற்பாடுகளை கைலாசநாதர் திருப்பணி கமிட்டியினர் செய்திருந்தனர்.