திருப்பதியில் தீப, தூப நைவேத்திய கட்டணம் உயர்வு: தேவஸ்தான அறங்காவலர் குழு முடிவு

திருப்பதி:  திருப்பதியில் தூப, தீப மற்றும் நைவேத்திய (சடங்கு காணிக்கைகள்) கட்டணம் ரூ. 5,000-லிருந்து ரூ. 10,000ஆக உயர்த்தப்பட்டுள்ளன. அக்ஷர கோவிந்தம் எனும் புதிய முன்னெடுப்பு விரைவில் தொடங்கப்படவுள்ளது.

இது குறி்தது திருப்பதி தேவஸ்தான அறங்காவலர் குழு கூட்டத்தில் முக்கிய முடிவுகள் எடுக்கப்பட்டுள்ளது. திருப்பதி தேவஸ்தான அறங்காவலர் குழுவின் கூட்டம், குழுவின் தலைவர் பி.ஆர். நாயுடு தலைமையில், இன்று புதன்கிழமையன்று திருமலையில் உள்ள அன்னமையா பவனில் நடைபெற்றது. இக்கூட்டத்தில் எடுக்கப்பட்ட முக்கிய முடிவுகள் பின்வருமாறு:

1. திருமலையில் உள்ள ஆழ்வார் டேங்க் விருந்தினர் மாளிகை சந்திப்பு முதல் பாட்டா கங்கம்மா சந்திப்பு வரை சர்வ தரிசன (பொது வரிசை) பாதைகளுக்குள், ரூ. 4.55 கோடி மதிப்பில் கூடுதல் கழிப்பறைகளைக் கட்டுவதற்கு ஒப்புதல் அளிக்கப்பட்டது.

2. ஒரு நியமிக்கப்பட்ட குழுவின் பரிந்துரையின் அடிப்படையில், திருமலையில் உள்ள பல்வேறு சாலைகள் மற்றும் போக்குவரத்துச் சந்திப்புகளுக்கு, ஆன்மீக மற்றும் புராண முக்கியத்துவம் வாய்ந்த பெயர்களைச் சூட்டுவதற்கு ஒப்புதல் அளிக்கப்பட்டது.

3. திருப்பதி தேவஸ்தான அறங்காவலர் குழுவின் கல்விக்குழு சமர்ப்பித்த அறிக்கையின் அடிப்படையில், கல்வி நிறுவனங்களுக்குள் அதிநவீன உள்கட்டமைப்பு வசதிகளை அமைப்பதற்காக, கூடுதலாக ரூ. 43.40 கோடியை ஒதுக்கீடு செய்ய ஒப்புதல் அளிக்கப்பட்டது. முந்தைய அறங்காவலர் குழு கூட்டத்தின்போதே இத்தேவைக்காக ரூ. 118 கோடி ஏற்கனவே ஒதுக்கீடு செய்யப்பட்டிருந்தது என்பது குறிப்பிடத்தக்கது. ஆகமொத்தமாக, தற்போது ரூ. 161.40 கோடி ஒதுக்கீடு செய்யப்பட்டுள்ளது. 4. திருமலையில் நீர் விரயத்தைக் கட்டுப்படுத்தவும், நாளுக்கு நாள் அதிகரித்து வரும் தினசரி நீர் தேவையைப் பூர்த்தி செய்யவும், கோகர்ப்பம் அணையிலிருந்து நீர் சுத்திகரிப்பு நிலையம் வரை சுமார் 2 கிலோமீட்டர் நீளத்திற்கு கூடுதல் குழாய் அமைப்பதற்கு, ரூ. 6 கோடி மதிப்பில் ஒப்புதல் அளிக்கப்பட்டது.

5. தேவஸ்தானத்தின் செயல்பாட்டுத் தேவைகளுக்குத் தேவையான பட்டு ஆடைகள், போர்வைகள் மற்றும் பிற பொருட்களை, APCO (ஆந்திரப் பிரதேசம்) மற்றும் Co-optex (தமிழ்நாடு) ஆகிய நிறுவனங்களிடமிருந்து, மொத்தம் ரூ. 44.20 கோடி மதிப்பில் கொள்முதல் செய்வதற்கு ஒப்புதல் அளிக்கப்பட்டது. 

6. அல்லூரி சீதாராம ராஜு மாவட்டத்தின் பாடேரு மண்டலத்தில் அமைந்துள்ள வர்தனபள்ளி கிராமத்தில், ஒரு சிவன் கோவிலைக் கட்டுவதற்கு ரூ.55 லட்சம் நிதியுதவி வழங்க ஒப்புதல் அளிக்கப்பட்டது.

7. சனாதன தர்மத்தை மேலும் பரப்பும் நோக்கில் தொடங்கப்பட்ட "அக்ஷர கோவிந்தம்" திட்டத்தில் பங்கேற்கும் குழந்தைகளுக்கு, இலவசத் தொகுப்புகளை வழங்க முடிவு செய்யப்பட்டது.