பாடலாத்ரி நரசிம்ம பெருமாள் கோவிலில் திருமஞ்சனம் நிறுத்தப்பட்டதால் பக்தர்கள் வேதனை

சிங்கபெருமாள் கோவில்: பாடலாத்ரி நரசிம்ம பெருமாள் கோவிலில் வேண்டுதல் திருமஞ்சனம் மீண்டும் நிறுத்தப்பட்டதால் பக்தர்கள் அதிருப்தி அடைந்துள்ளனர். சிங்கபெருமாள் கோவில் அனுமந்தபுரம் சாலையில் பழமையான பாடலாத்ரி நரசிம்ம பெருமாள் கோவில் உள்ளது. ஹிந்து சமய அறநிலையத் துறை கட்டுப்பாட்டில் உள்ள இக்கோவிலில், பக்தர்கள் தங்கள் வேண்டுதலை நிறைவேற்ற பிரதோஷ திருமஞ்சனம் மற்றும் பிரசாதங்கள் வழங்குவது வழக்கம். இதற்காக கோவில் நிர்வாகம் சார்பில் திருமஞ்சனம் கோரும் பக்தர்களிடம் தலா 2,000 ரூபாய் வரை வசூலிக்கப்படுகிறது. இந்நிலையில் கோவில் நிர்வாகம் சார்பில் இந்த கட்டணங்களின் விலை உயர்த்தப்படுவதாக கடந்த பிப்., மாதம் அறிவிக்கப்பட்டது. இதற்கு பக்தர்கள் எதிர்ப்பு தெரிவித்து கோவில் நிர்வாகத்திடம் மனு அளித்தனர்.

இதையடுத்து, விலை ஏற்றம் நிறுத்தி வைக்கப்பட்டு உள்ள நிலையில் பக்தர்களின் வேண்டுதல் திருமஞ்சனம் நிறுத்தி வைக்கப்பட்டிருந்தது. இது குறித்து நம் நாளிதழில் கடந்த ஆக., மாதம் செய்தி வெளியானது. இதையடுத்து, விலை ஏற்றத்துடன் திருமஞ்சனம் நடத்தப்பட்டது. இதற்க்கு மீண்டும் பக்தர்கள் எதிர்ப்பு தெரிவிக்கவே கடந்த 21ம் தேதி முதல் திருமஞ்சனம் மீண்டும் நிறுத்தி வைக்கப்பட்டுள்ளது. 

இது குறித்து பக்தர்கள் கூறியதாவது: பாடலத்ரி நரசிம்ம பெருமாள் கோவிலுக்கு வரும் பக்தர்கள், தனிக்கட்டணம் செ லுத்தி சுவாமிக்கு திருமஞ்சனம் செய்வது வழக்கம். கடந்த பிப்.,மாதம் திருமஞ்சனம் மற்றும் பிரசாத கட்டணம் உயர்த்தப்படுவதாக கோவில் நிர்வாகம் தரப்பில் அறிவிப்பு வெளியிடப்பட்டது. இதற்கு பக்தர்கள் எதிர்ப்பு தெரிவித்ததால், எந்தவித நடவடிக்கையும் எடுக்காமல் கோவில் நிர்வாகத்தினர் திருமஞ்சனத்தை நிறுத்தி வைத்தனர். புரட்டாசி மாதத்தில் பெருமாளுக்கு வேண்டுதல் வைத்துள்ள பக்தர்கள் மன சங்கடம் அடைந்து வருகின்றனர். கோவிலுக்கு சொந்தமான கடைகளை ஆண்டுதோறும் வாடகைக்கு ஏலம் விடும் பணி நிலுவை யில் உள்ளது. இதனால், திருமஞ்சனம் மற்றும் பிரசாதங்களின் விலையும் அதிகரித்துள்ளது. எனவே பழைய கட்டணத்தில் திருமஞ்சனம் நடத்த ஹிந்து சமய அறநிலையத் துறை அதிகாரிகள் நடவடிக்கை எடுக்க வேண்டும். இவ்வாறு அவர்கள் கூறினர்.