ஜலகண்டேஸ்வர் கோவில் குளத்தை துார் வாரி பராமரிக்க கோரிக்கை

கும்மிடிப்பூண்டி: கவரைப்பேட்டை அருகே, ஏ.என்.குப்பம் கிராமத்தில் உள்ள சிவன் கோவில் குளத்தை துார் வாரி பராமரிக்க வேண்டும் என, கிராம மக்கள் கோரிக்கை விடுத்துள்ளனர்.

கவரைப்பேட்டை அடுத்த ஏ.என்.குப்பம் கிராமத்தில், சிதிலமடைந்த ஜலகண்டேஸ்வர் கோவில் அமைந்துள்ளது. கோவில் முகப்பில், பரந்து விரிந்த கோவில் குளம் உள்ளது. அந்த குளம் ஏ.என்.குப்பம் கிராமத்தில், முக்கிய நீர் ஆதாரமாகவும் உள்ளது. ஊராட்சி நிர்வாகத்தினர், அந்த குளத்தை முறையாக பராமரிக்க தவறியதால், குளத்தை சுற்றி செடி, கொடிகள் சூழ்ந்து உள்ளது. மேலும், குளத்தின் உட்புறத்தில் பெரும் பகுதி துார்ந்து போன நிலையில் உள்ளது. தொடர் மழைக்கு முன், செடி, கொடிகளை அகற்றி, துார் வாரி முறையாக பராமரிக்க வேண்டும் என, கிராம மக்கள் கோரிக்கை விடுத்துள்ளனர்.