பிறர் கவனத்தைத் திருப்பும் விதத்தில் ஆரவாரமாக கோவிலில் வழிபாடு செய்வது சரியா?

ஆரவாரம் என்று தாங்கள் எதைக் குறிப்பிடுகிறீர்கள் என்று புரியவில்லை. ஆண்டவன் முன் எல்லோரும் சமம். அனைவருக்குமே ஒரே மாதிரி கவுரவம் செய்யப்பட வேண்டும் என்ற கருத்துக்கள் பொதுவானவை. பாதுகாப்பு தேவைப்படுகின்ற பிரமுகர்கள் தரிசனத்துக்கு வந்து செல்லும்போது கொஞ்சம் பரபரப்பான சூழல் ஏற்படும். மேலும், அன்றைய வழிபாட்டின் உபயதாரர்கள் பக்தி மிகுதியால் சுவாமிக்கு விரும்பி செய்யும் சில விஷயங்கள் சற்று ஆரவாரத்தை ஏற்படுத்தலாம். தவிர்க்க முடியாத இதுபோன்ற ஒருசில விஷயங்களை நீங்கள் கவனத்தில் கொள்ளாத பட்சத்தில், திசைதிருப்பும் ஆரவாரம் என்று சொல்ல வேண்டிய அவசியம் வராது. நாம் வந்த வேலை சுவாமியை தரிசிப்பது. அதில் முழுக்கவனத்தை செலுத்தி விட்டால், எந்த ஆரவாரமும் நம் கவனத்தை திசை திருப்ப முடியாது.