தவறுகளை ஏற்கும் துணிச்சல் வேண்டும் மேஜிக் மனி முதலீட்டு கருத்தரங்கில் நிபுணர்கள் தகவல்

பங்குச் சந்தையின் ஏற்ற - இறக்கங்களில் லாபம் ஈட்டுவது எப்படி; தங்கம், வெள்ளி, கடன் பத்திரங்கள் போன்றவற்றில் எது நமக்கான லாபகரமான முதலீடு என்பது குறித்த குழப்பங்களுக்கு தீர்வு காணும் வகையில், 'மேஜிக் 20 தமிழ்' நிறுவனம் 'மேஜிக் மனி டி.என். சம்மிட்- 2026'என்ற கருத்தரங்கை சென்னையில் நேற்று நடத்தியது. பல நிபுணர்கள் இதில் பங்கேற்று, முதலீட்டாளர்கள் எந்தப் பாதையில் பயணிக்க வேண்டும் என்பதை விளக்கமாக எடுத்துரைத்தனர். ''அடுத்த ஐந்து ஆண்டுகளில், நம் நாட்டின் வர்த்தகப் பற்றாக்குறை, உபரியாக மாறக்கூடிய வாய்ப்புள்ளது. எனவே, ரூபாய் மீதான அழுத்தம் குறையும்போது, நடுத்தர வர்க்கத்தினரின் பொருளாதாரம் மேம்படும். தொழில் செய்வதற்கு புதிய ஐடியாக்கள் இருப்பின், அதை செயல்படுத்த முயற்சிக்க வேண்டிய தருணம் இது. வரும் ஆண்டுகளில் அதிக நிதி ஆதாரத்தை ஏற்படுத்தி கொடுக்கும் ஒரு வாய்ப்பாக இருக்கும்.-ஆனந்த் ராதாகிருஷ்ணன், சுந்தரம் மியூச்சுவல் பண்டு ''எவ்வளவு ரிஸ்க் எடுக்க முடியும்; எந்த திட்டம் அதிக வருவாய் ஈட்டி தரும் என்பதை மட்டுமே பார்க்க வேண்டும். வரும் நாட்களில் பங்குச் சந்தைகளில் செய்யப்படும் முதலீடுகள் பணவீக்க விகிதங்களை விட கூடுதலாக வருவாய் கொடுக்க வாய்ப்புள்ளது. -கே.ராஜசா, பிராங்க்ளின் டெம்பிள்டன் ''உலகிலேயே நம் நாட்டில்தான் பணவீக்க விகிதம் குறைவாக உள்ளது. உள்நாட்டு பொருளாதார காரணிகள் சாதகமாகவே உள்ளன. சிறு முதலீட்டாளர்கள் பங்களிப்பு புரட்சியை ஏற்படுத்தியுள்ளது என்றே கூறலாம். பங்குச் சந்தைகள் தொடர் ஏற்றத்தில் இருக்க வாய்ப்பு உள்ளது. -லஷ்மி அய்யர், பஜாஜ் ஆல்டர்நேட்ஸ். ''நீண்ட கால முதலீடு செய்வதே சிறந்தது. எல்லாம் எனக்கு தெரியும் என்ற எண்ணத்துடனோ, யாராவது கூறுவதை கேட்டு முதலீடு செய்வதையோ தவிர்ப்பது நல்லது. முதலீடு செய்யும் முன் நாமாக ஆய்வு செய்து பங்குகளை தேர்ந்தெடுக்க வேண்டும். சென்டிமென்ட் வேண்டாம்; முதலீட்டு ஆலோசகர் கூறுவதை கேட்கலாம். -கார்த்திகேயன், கோயம்புத்துார் கேபிட்டல் ''நீண்டகால முதலீட்டாளராக இருப்பது தான் சரியானதாக இருக்கும். செய்யப்பட்ட முதலீட்டை ஓராண்டாவது நீட்டிப்பது அவசியம். தவறுகளை ஏற்றுக்கொள்ளும் துணிச்சல் வர வேண்டும். அப்போதுதான் உண்மையான முதலீட்டுப் பயணம் துவங்குகிறது. கடந்த ஐந்து ஆண்டுகளாக பங்கு வணிகர்களாக இருப்பவர்கள், தற்போது முதலீட்டாளர்களாக மாற வேண்டிய சூழல் ஏற்பட்டுள்ளது. -ஷியாம் சேகர், ஐதாட்