பாக்., ஐஎஸ்ஐ தொடர்புடைய பயங்கரவாதிகள் 3 பேர் டில்லியில் கைது

புதுடில்லி: பாகிஸ்தானின் ஐஎஸ்ஐ உளவு அமைப்புடன் தொடர்புடைய பயங்கரவாதிகள் 3 பேரை டில்லி போலீசார் கைது செய்தனர். இந்தியாவில் பயங்கரவாத தாக்குதல்களை நடத்துவதற்கு பயங்கரவாதிகளுக்கு பாகிஸ்தான் நாட்டின் உளவு அமைப்பான ஐஎஸ்ஐ சதி செய்து வருகிறது. அந்த வகையில், இந்தியாவின் வட மாநிலங்களில் அமைதியை சீர்குலைப்பதற்காக, கிரிமினல் குழுக்களுக்கு நவீன ஆயுதங்களையும் சப்ளை செய்து வருகின்றனர்.இது குறித்து உளவுத்துறை தகவல் அடிப்படையில், டில்லியில் இன்று (நவ.,30) போலீசார் நடத்திய சோதனையில் ஐஎஸ்ஐ அமைப்புடன் தொடர்புடைய பயங்கரவாதிகள் 3 பேர் கைது செய்யப்பட்டனர். இவர்கள் பஞ்சாபை சேர்ந்த ஹர்குன்பிரீத் சிங், மத்திய பிரதேசத்தை சேர்ந்த விகாஸ் பிரஜாபதி மற்றும் உத்தரப் பிரதேசத்தின் பிஜ்னோரைச் சேர்ந்த ஆரிப் என அடையாளம் காணப்பட்டு உள்ளனர். இவர்களிடம் போலீசார் விசாரணை நடத்தி வருகின்றனர். கடந்த நவ.,23ம் தேதி ஐஎஸ்ஐ அமைப்புடன் தொடர்புடைய ஆயுதக் கடத்தல் கும்பலை சேர்ந்த 4 பேர் கைது செய்யப்பட்டனர். அவர்களிடம் நடத்திய விசாரணையை தொடர்ந்து இன்று பயங்கரவாதிகள் 3 பேர் சிக்கி இருக்கின்றனர் என டில்லி வட்டாரங்கள் தகவல் தெரிவிக்கின்றன. இந்த நடவடிக்கையின் காரணமாக, தாக்குதலுக்கான சதித்திட்டம் முறியடிக்கப்பட்டுள்ளது.