போலி ஆவணங்கள் மூலம் ரூ.111 கோடி பெற முயன்ற பஞ்சாயத்து தலைவர் கைது

பால்கர்: மஹாராஷ்டிராவில், போலி ஆவணங்கள் மூலம், 111 கோடி ரூபாயை மோசடியாக பெற முயன்ற நகர பஞ்சாயத்து தலைவரை போலீசார் கைது செய்தனர். மஹாராஷ்டிராவின் பால்கர் மாவட்டத்தில் உள்ள விக்ரம்கட் என்ற நகர பஞ்சாயத்தின் தலைவராக இருப்பவர் நிலேஷ். இவர், 'ஓ.வி., கன்ஸ்ட்ரக் ஷன்' என்ற கட்டுமான நிறுவனத்தையும் நடத்தி வருகிறார். அதிர்ச்சி இந்நிறுவனத்தின் பெயரில், 111 கோடி ரூபாய்க்கு வரைவு காசோலை வழங்கும்படி, மாநில அரசின் பொதுப்பணித் துறையின் போலி கோரிக்கை கடிதம், பால்கர் மாவட்டத்தில் உள் ள எஸ்.பி.ஐ., வங்கிக் கிளையில் சமீபத்தில் வழங்கப்பட்டது. இந்த கடிதத்திலும், அதனுடன் இருந்த காசோலையிலும் பொதுப்பணித் துறையின் நிர்வாகப் பொறியாளர் மற்றும் கணக்காளரின் கையெழுத்துகள் இருந்தன. கடிதத்தை ஆய்வு செய்த வங்கி அதிகாரிகள் அதிர்ச்சி அடைந்தனர். அதில், 'கோடி' என்பதற்கு பதில், 'பில்லியன்' என இருந்தது. மேலும், கோரிக்கை கடிதம் எழுதும் பாணியும் முற்றிலும் மாறுபட்டிருந்தது. காசோலை பொதுப்பணித் துறையிடம் இருந்து இ - மெயில் மூலம் எந்த பதிலும் கிடைக்காததால், வங்கி ஊழியர் ஒருவர், ஜவஹரில் உள்ள அத்துறை அலுவலகத்துக்கு நேரடியாகவே சென்றார். அங்கிருந்த அதிகாரிகள், இந்த கோரிக்கை கடிதம் மற்றும் வரைவு காசோலை பற்றி தங்களுக்கு எதுவும் தெரியாது என தெரிவித்தனர். நடந்த சம்பவத்தை மூத்த அதிகாரிகளிடம் வங்கி ஊழியர் கூறினார். இதையடுத்து, எஸ்.பி.ஐ.,யின் மூத்த அதிகாரிகள், பொதுப்பணித் துறை நிர்வாகப் பொறியாளரை நேரில் சந்தித்தனர். அப்போது, 'இந்த கோரிக்கை கடிதத்தில் உள்ள கையெழுத்து என்னுடையது அல்ல' என, அவர் திட்டவட்டமாகக் கூறினார். இது குறித்து வங்கி தரப்பில் போலீசில் புகார் அளிக்கப்பட்டது. வழக்குப் பதிந்த போலீசார், போலி ஆவணங்கள் மூலம், 111 கோடி ரூபாயை மோசடியாக பெற முயன்ற விக்ரம்கட் நகர பஞ்சாயத்து தலைவர் நிலேஷை கைது செய்தனர்.