ஸ்வியாடெக் ஜோடி முன்னேற்றம்: யு.எஸ்., ஓபன் அரையிறுதிக்கு

நியூயார்க்: யு.எஸ்., ஓபன் டென்னிஸ் கலப்பு இரட்டையர் அரையிறுதிக்கு ஸ்வியாடெக் (போலந்து), காஸ்பர் ரூட் (நார்வே) ஜோடி முன்னேறியது.அமெரிக்காவின் நியூயார்க்கில், யு.எஸ்., ஓபன் கிராண்ட்ஸ்லாம் டென்னிஸ் தொடர் நடக்கிறது. இம்முறை கலப்பு இரட்டையர் பிரிவு போட்டிகள் புதிய முறையில் நடக்கிறது. ஒரு செட்டை கைப்பற்ற, 4 'கேம்' வென்றால் போதும்.இதன் காலிறுதியில் போலந்தின் இகா ஸ்வியாடெக், நார்வேயின் காஸ்பர் ரூட் ஜோடி, அமெரிக்காவின் கேட்டி மெக்னலி, இத்தாலியின் லோரென்சோ முசெட்டி ஜோடியை சந்தித்தது. அபாரமாக ஆடிய ஸ்வியாடெக், ரூட் ஜோடி 4-1, 4-2 என்ற நேர் செட் கணக்கில் வெற்றி பெற்று அரையிறுதிக்குள் நுழைந்தது.மற்றொரு காலிறுதியில் அமெரிக்காவின் ஜெசிகா பெகுலா, பிரிட்டனின் ஜாக் டிராப்பர் ஜோடி 4-1, 4-1 என, ரஷ்யாவின் மிர்ரா ஆன்ட்ரீவா, டேனியல் மெத்வெடேவ் ஜோடியை வீழ்த்தியது.'நடப்பு சாம்பியன்' இத்தாலியின் சாரா இரானி, ஆன்ட்ரியா வவாசோரி ஜோடி 4-1, 5-4 என்ற கணக்கில் செக்குடியரசின் கரோலினா முசோவா, ரஷ்யாவின் ஆன்ட்ரி ருப்லெவ் ஜோடியை வீழ்த்தி அரையிறுதிக்கு முன்னேறியது. அமெரிக்காவின் டேனியல் கோலின்ஸ், கிறிஸ்டியன் ஹாரிசன் ஜோடி 4-1, 5-4 என சகநாட்டை சேர்ந்த டெய்லர் டவுன்சென்ட், பென் ஷெல்டன் ஜோடியை தோற்கடித்தது.