கிளாம்பாக்கம்: கிளாம்பாக்கம் முனையத்திற்கு பேருந்தில் வந்த பயணியிடம், போலீஸ் எனக் கூறி காரில் கடத்தி, கத்தியை காட்டி மிரட்டி, 40 லட்சம் ரூபாயை அபகரித்துச் சென்ற மர்ம நபர்களை, போலீசார் தேடி வருகின்றனர். திருச்சியில் ரியல் எஸ்டேட் தொழில் செய்து வருபவர் பாபு ஜான். இவரது உதவியாளர் சரவணகுமார், 55. இந்நிலையில் பாபுஜான், அவசர தேவைக்காக, சென்னை மண்ணடியில் உள்ள நண்பரிடம், 40 லட்சம் ரூபாய் கடனாக கேட்டுள்ளார். பின், அந்த பணத்தை வாங்கி வர, திருச்சியிலிருந்து தன் உதவியாளர் சரவணகுமாரை, கடந்த 27ம் தேதி, பேருந்தில் அனுப்பியுள்ளார். சென்னை வந்திறங்கிய சரவணகுமார், நேற்று முன்தினம் இரவு, பாபுஜான் கூறிய நண்பரிடம் இருந்து 40 லட்சம் ரூபாயை பெற்று, அதை ஒரு பையில் வைத்துள்ளார். பின், கிளாம்பாக்கம் செல்வதற்காக, இரவு 9:00 மணியளவில், அண்ணா சாலை எல்.ஐ.சி., நிறுத்தத்தில், பணப்பை உடன் பேருந்தில் ஏறியுள்ளார். இரவு 10:30 மணியளவில், பேருந்து வண்டலுாரை நெருங்கிய போது, அதே பேருந்தில் அமர்ந்திருந்த இரண்டு நபர்கள், சரவணகுமாரிடம் இருந்த பணப்பையை பிடுங்கியுள்ளனர். அப்போது, சரவணகுமார் கத்தி கூச்சலிட்டுள்ளார். இதை தட்டிக் கேட்ட பேருந்து ஓட்டுநர் மற்றும் சக பயணியரிடம்,'நாங்கள் போலீஸ். இந்த பையில் கஞ்சா வைத்துள்ளார்' எனக் கூறி, பேருந்தை நிறுத்த செய்துள்ளனர். பின், பணப்பையுடன் சரவணகுமாரை கீழே இறக்கி, அங்கு ஏற்கனவே காத்திருந்த காரில் அவரை ஏற்றி உள்ளனர். அந்த காரில், ஏற்கனவே இருவர் இருந்துள்ளனர். பின், நான்கு பேர் கொண்ட கும்பல், சரவணகுமாரை கத்தியைக் காட்டி, கொலை செய்து விடுவதாக மிரட்டி, அவரிடமிருந்த பணப்பையை பறித்துக் கொண்டு, பொத்தேரி அருகே இறக்கி விட்டு தப்பிச் சென்றுள்ளனர். சம்பவம் குறித்து சரவணகுமார், கிளாம்பாக்கம் காவல் நிலையத்தில் புகார் அளித்தார். அதன்படி, கிளாம்பாக்கம் போலீசார் அப்பகுதியில் உள்ள கண்காணிப்பு கேமரா காட்சிகளை ஆய்வு செய்து, மர்ம நபர்களை தேடி வருகின்றனர். போலீசார் கூறியதாவது: சரவணகுமார், 40 லட்சம் ரூபாய் பணத்துடன் திருச்சி திரும்புகிறார் என்பதை அறிந்தே, இந்த சம்பவம் நடந்துள்ளது. அப்படி என்றால், மர்ம நபர்களுக்கு முன்கூட்டியே இந்த பணப்பரிமாற்ற விஷயம் தெரிந்துள்ளது. எனவே, பணத்தை கொடுத்த நபர் அல்லது வாங்கிய நபர், இருவரில் ஒருவர் தான், இந்த சம்பவத்தின் பின்னணியில் மூளையாக இருக்க வேண்டும். அந்த கோணத்திலும் விசாரணை நடக்கிறது. இவ்வாறு அவர்கள் கூறினர்.