பொதுஅறிவை வளர்க்கும் தினமலர் - பட்டம் இதழ்; வினாடி-வினாவில் பி.ஏ., சர்வதேச பள்ளி அசத்தல்

பொள்ளாச்சி: 'தினமலர்' நாளிதழின் மாணவர் பதிப்பான, 'பட்டம்' இதழ் மற்றும் எஸ்.என்.எஸ். கல்விக்குழுமம் சார்பில், 'பதில் சொல் -- பரிசை வெல்' மெகா வினாடி --- வினா போட்டி, பொள்ளாச்சி, பி.ஏ., சர்வதேச பள்ளியில் நடந்தது. மாணவர்களின் கற்றல் ஆர்வம் மற்றும் நுண்ணறிவு திறனை ஊக்குவித்து, படிப்பின் மீதான ஆர்வத்தை விரிவுப்படுத்துவதற்காக, 'தினமலர்' நாளிதழ் 'பட்டம்' இதழ் சார்பில், மெகா வினாடி -- -வினா போட்டிகள் ஆண்டுதோறும் நடத்தப்பட்டு வருகின்றன. நடப்பாண்டு, 'தினமலர்' நாளிதழின், 'பட்டம்' இதழ் மற்றும் எஸ்.என்.எஸ். கல்விக் குழுமம் இணைந்து நடத்தும் வினாடி- - வினா போட்டிக்கு, 'சத்யா ஏஜென்சிஸ்' மற்றும் 'ஸ்போர்ட்ஸ் லேண்ட்' நிறுவனங்கள், 'கிப்ட் ஸ்பான்சர்'களாக இணைந்துள்ளன. இப்போட்டியில், கோவை, திருப்பூர், நீலகிரி மாவட்டங்களில் இருந்து, 150க்கும் மேற்பட்ட பள்ளி மாணவர்கள் பங்கேற்கின்றனர். பள்ளி அளவில் முதலிடம் பிடிக்கும் அணியினர், அரையிறுதிக்கு தகுதி பெறுவர். அவர்களில் இருந்து தேர்வாகும் எட்டு அணியினர், இறுதிப் போட்டியில் பங்கேற்பர். அவ்வகையில், பொள்ளாச்சி பி.ஏ., சர்வதேச பள்ளியில் வினாடி - வினா போட்டி நடந்தது. தகுதிச்சுற்றில், 120 மாணவர்கள் பங்கேற்றனர். அதில், அதிக மதிப்பெண் பெற்ற, 16 மாணவ, மாணவியர், எட்டு அணிகளாக பிரிக்கப்பட்டு பள்ளி அளவில் இறுதிப் போட்டியில் பங்கேற்றனர். மூன்று சுற்றுகளாக நடந்த விறுவிறுப்பான இறுதி போட்டியில், 'சி' அணி முதல் பரிசை வென்றது. அந்த அணியில் இடம் பெற்ற, 9ம் வகுப்பு மாணவர்கள் தர்ஷன், பிரஜ்வின் ஆகியோர் வெற்றி பெற்றனர். வெற்றி பெற்ற மாணவர்களுக்கு பள்ளி முதல்வர் மகேஷ் கே. நாராயணன், ஒருங்கிணைப்பாளர்கள் ஸ்ரீவித்யா, சுகன்யா, ஆசிரியர்கள் கலைவாணி, காமிலாபானு ஆகியோர் பதக்கங்கள் மற்றும் சான்றிதழ்களை வழங்கி பாராட்டினர். கல்விக்கு கைகொடுக்கும்! பள்ளி முதல்வர் மகேஷ் கே நாராயணன் கூறுகையில், 'தினமலர் - பட்டம்' இதழ், பழங்காலம் முதல் டிஜிட்டல் உலகம் வரையிலான செய்திகளை மாணவர்களிடம் எடுத்துச் செல்கிறது. கண்டுபிடிப்புகள், உலகம், அறிவியல் நுணுக்கங்கள், அரசியலமைப்பு என, அனைத்து தகவல்களை அறிந்து கொள்ள முடிகிறது. 'பட்டம்' இதழ், கல்வி புகட்டும் களமாக திகழ்கிறது. மாணவர்கள் எளிதாக பொழுது போக்குடன் அறிவை பெறுவதற்கு 'பட்டம்' இதழ் முக்கிய பங்கு வகிக்கிறது. பொதுவாக 'பட்டம்' இதழ் கல்விக்கு கைகொடுக்கும், என்றார்.

உயர்கல்விக்கு வழிகாட்டி!

மாணவர் தர்ஷன்: 'பட்டம்' இதழில் அறிவை வளர்க்கும் விதமாக அமைந்துள்ளது. இதில், அறிவியல் சார்ந்த செய்திகள், பொது அறிவு வினாக்கள், புதுவிதமான கண்டுபிடிப்புகள், பல்வேறு விதமான ஆய்வுகள், உலக நடைமுறை உள்ளிட்டவைகளை அறிந்து கொள்ள முடிகிறது. 'பட்டம்' இதழில் வெளியாகும் துணுக்குகள் ருசிகரமாக உள்ளது. மாணவர் பிரஜ்வின்: விளையாட்டு, வரலாறு, வேளாண்மை, தமிழ் சார்ந்த கவிதை மற்றும் கட்டுரைகள் என, பல்வேறு தலைப்புகளில் 'தினமலர் --- பட்டம்' இதழில் வெளியாகும் தகவல்கள் பெரிதும் பயனுள்ளதாக அமைகிறது. பொதுஅறிவு பெட்டகமாக 'பட்டம்' இதழ் விளங்குகிறது. தொடர்ந்து 'பட்டம்' இதழ் படித்து வந்தால் உயர்கல்விக்கான தேர்வுகளை எளிதாக எதிர்கொள்ள முடியும்.