இணையதளம் முடக்கம்; சான்றிதழ் பெற முடியாமல் அவதி

கோவை: இணையதளம் முடங்குவதால், உரிய நேரத்தில் சான்றிதழ் பெற முடியாமல் மாணவர்கள், பெற்றோர் அவதிக்குள்ளாவதாக புகார் தெரிவிக்கப்படுகிறது. கல்வி மற்றும் வேலைவாய்ப்பு சலுகைகளை பெற சாதி, வருமானம் உள்ளிட்ட பல்வேறு சான்றிதழ்கள் வருவாய் துறை மூலம் வழங்கப்பட்டு வருகின்றன. இச்சான்றிதழ்களை பெற பெரும்பாலும் இ-சேவை மையத்தை பொதுமக்கள் நாடுகின்றனர். இதற்காக இ-டிஸ்ட்ரிக்ட் இணையதளம் செயல்பட்டு வருகிறது. இ-சேவை மையங்கள் மட்டுமின்றி பொதுமக்கள் நேரடியாகவும் இந்த இணையதளம் மூலம் விண்ணப்பிக்கலாம். ஆனால், கடந்த சில தினங்களாக இணையதளம் அடிக்கடி முடங்கி வருகிறது. குறிப்பாக கடந்த சனிக்கிழமை இரவு முதல் இணையதளம் முடங்கியது. இந்நிலையில் பராமரிப்பின் காரணமாக நேற்று மதியம், 12:00 மணி வரை செயல்படாது எனத் தெரிவிக்கப்பட்டிருந்தது. ஆனால், நேற்று மதியம், 12:00 மணிக்கு பின்னரும் இணையதளம் செயல்படவில்லை. மதியம், 2:00 மணிக்கு பின்னரே இணையதள சேவை துவங்கியது. இதனால், மாணவர்கள், பெற்றோர் சான்றிதழ் பெற முடியாமல் கடும் அவதிக்குள்ளானதாக புகார் தெரிவிக்கப்படுகிறது. தொடர்ந்து இதுபோல் இணையதளம் முடங்குவதால் உரிய நேரத்தில் சான்றிதழ் பெற முடியாமல் சலுகைகளை பெறுவதில் சிக்கல் ஏற்படுவதாகவும் தெரிவிக்கப்படுகிறது.