டிட்வா புயல் மழையை எதிர்கொள்ள அரசு நிர்வாகம் தயார்: அமைச்சர் தகவல்

கடலுார்: டிட்வா புயல் மழையினை எதிர்கொள்ள அரசு நிர்வாகம் தயார் நிலையில் உள்ளது என, அமைச்சர் பன்னீர்செல்வம் கூறினார். கடலுார் மாவட்ட கண்காணிப்பு அலுவலர் அன்பழகன், கலெக்டர் சிபி ஆதித்யா செந்தில்குமார், அய்யப்பன் எம்.எல்.ஏ., ஆகியோர் முன்னிலையில் அமைச்சர் பன்னீர்செல்வம் நிருபர்களிடம் கூறியதாவது: கடலுார் மாவட்டத்தில் பாதிப்பு ஏற்படக்கூடிய, 239 இடங்கள் கண்டறியப்பட்டு, அனைத்து முன்னேற்பாடு பணிகளும் மேற்கொள்ளப் பட்டுள்ளன. பொதுமக்களை பாதுகாப்பாக தங்க வைக்க, 28 புயல் பாதுகாப்பு மையங்கள், 14 பல்நோக்கு பாதுகாப்பு மையங்கள், 191 தற்காலிக தங்கும் இடங்கள் ஆகியவற்றின் மூலம் 1,54,875 பேர், தங்க வைக்கும் அளவிற்கு அனைத்து அடிப்படை வசதிகளுடன் தயார் நிலையில் உள்ளன. மீட்புப் பணிகளில் ஈடுபட தேசிய பேரிடர் மீட்புக்குழுவினர் 35 பேர், பேரிடர் மீட்புக்குழுவினர் 45 பேர் மற்றும் மாநில பேரிடர் மீட்புக்குழுவினர், 60 பேர் வருகை புரிந்துள்ளனர். அனைத்து அரசு மருத்துவமனைகளிலும் மின்சாரம் தடையின்றி வழங்கும் வகையில் ஜெனரேட்டர் வசதிகள், 24 மணிநேரமும் சிகிச்சை அளிக்கக்கூடிய வகையில் டாக்டர்கள் சுழற்சி முறையில் ஈடுபட உள்ளனர். போதிய மருந்து வசதிகளும் இருப்பு உள்ளன. குறிப்பாக அடுத்த ஒரு வாரகாலத்தில் பிரசவம் மேற்கொள்ள, 925 கர்ப்பிணிகள் உள்ளனர். அவர்களுக்கு மழையின் போது மகப்பேறு சிகிச்சை மேற்கொள்வதற்கான வசதிகளும் மேற்கொள்ளப் பட்டுள்ளன. மழைநீரினால் சூழப்பட்ட விளைநிலங்களில் உள்ள தண்ணீரினை உடனுக்குடன் அகற்ற நடவடிக்கை மேற்கொள்ளப்பட்டுள்ளது. விவசாயிகள் அனைவரும் தங்கள் நிலங்களுக்கு காப்பீடு செய்ய வரும் டிச., 1ம் தேதி வரை கால நீட்டிப்பு செய்யப்பட்டுள்ளது. இவ்வாறு அவர் தெரிவித்தார். இந்நிகழ்ச்சியில் எஸ்.பி., ஜெயக்குமார், டி.ஆர்.ஓ., புண்ணிய கோட்டி, ஆர்.டி.ஓ., சுந்தரராஜன் உட்பட பலர் கலந்து கொண்டனர்.