சிமெண்ட் காரை பெயர்ந்து புதிய நாடக மேடை சேதம்

நடுவீரப்பட்டு: நடுவீரப்பட்டு அருகே கட்டப்பட்ட 3 மாதத்திலேயே நாடக மேடையின் சிமெண்ட் காரைகள் பெயர்ந்து விழுந்த சம்பவம் அரங்கேறியுள்ளது. நடுவீரப்பட்டு அடுத்த குமளங்குளம் ஊராட்சிக்குட்பட்ட சஞ்சீவிராயன்கோவில் கிராமத்தில் எஸ்.எப்.சி., திட்டத்தின் கீழ் கடந்த 3 மாதங்களுக்கு முன் நாடக மேடை கட்டப்பட்டது. தற்போது வெயிலின் தாக்கம் காரணமாக இரவு நேரங்களில் சிலர் நாடக மேடையில் துாங்குவது வழக்கம். நேற்று முன்தினம் இரவு வழக்கம் போல் சிலர் துாங்கினர். அதிகாலையில் இயற்கை உபாதை கழிக்க சென்று திரும்பிய போது, கட்டடத்தின் மேல்பகுதியில் இருந்து சிமெண்ட் காரைகள் பெயர்ந்து கீழே விழுந்தை கண்டு அதிர்ச்சியடைந்தனர். பல லட்சம் மதிப்பில் கட்டப்பட்ட நாடக மேடையில் தரமில்லாத பணிகளால் தான் சிமெண்ட் காரைகள் பெயர்ந்து விழுந்து விட்டதாக பொதுமக்கள் கேள்வி எழுப்பியுள்ளனர்.