மூதாட்டி கொலையில் வாலிபர் கைது

ஈரோடு, ஈரோடு பெரிய சேமூர் முதலி தோட்டம் எல்.வி.ஆர்., காலனியைய சேர்ந்த மணி மனைவி கமலம், 68; கடந்த, 27ம் தேதி இரவு, வீட்டில் கொலை செய்யப்பட்டு கிடந்தார். அவர் அணிந்திருந்த, 5 பவுன் தங்க சங்கிலி, மொபைல்போன் திருடு போனது. கமலத்தின் மருமகள் புகாரின்படி வீரப்பன்சத்திரம் போலீசார் விசாரித்தனர்.அதே பகுதியில் இயங்கி வரும் தனியார் மென்பொருள் கம்பெனியில், வெளியூரில் இருந்து வந்து தங்கி வேலை செய்பவர்களுக்காக, கமலத்தின் வீட்டின் அருகே கம்பெனி சார்பில் சிலர் வீடுகளை வாடகைக்கு எடுத்து தங்கியிருந்தனர். சந்தேகப்பட்டு அங்கு விசாரித்தபோது ராமநாதபுரம் திருவாடனை தோப்பு காலனியை சேர்ந்த பன்னீர் செல்வம் மகன் ராமு, 20, மாயமானது தெரியவந்தது. அவரை தேடியபோது, அவிநாசியில் சிக்கினார். விசாரணையில் மூதாட்டியை கொலை செய்ததை ஒப்பு கொண்டார். அவரை கைது செய்து, தங்கச்சங்கிலியை கைப்பற்றினர். கைதான ராமுவுக்கு நான்கு சகோதரர், இரு சகோதரிகள் உள்ளனர்.