3 பசு மாடுகள் உயிரிழப்பு போலீஸ் விசாரணை

தியாகதுருகம்: தியாகதுருகம் அருகே மர்மமான முறையில் 3 பசு மாடுகள் இறந்தது குறித்து போலீசார் விசாரித்து வருகின்றனர்.தியாகதுருகம் அடுத்த மேல்வழி கிராமத்தைச் சேர்ந்தவர் ஆறுமுகம், 40; விவசாயி. இவர், நேற்று முன்தினம் தான் வளர்க்கும் 3 பசு மாடுகளுக்கு தண்ணீர் குடிக்க வைத்து நிழலில் கட்டி விட்டு குடும்பத்துடன் சித்தலுார் கோவிலுக்குச் சென்றார். மதியம் 12:30 மணிக்கு திரும்பி வந்து பார்த்தபோது 3 மாடுகளும் இறந்து கிடந்தன.தொட்டியில் இருந்த தண்ணீரின் நிறம் மாறி இருந்ததால் யாரேனும் விஷம் கலந்து இருக்கலாம் என்ற சந்தேகம் ஏற்பட்டது. இது குறித்து ஆறுமுகம் அளித்த புகாரின் பேரில், தியாகதுருகம் போலீசார் வழக்குப் பதிந்து விசாரித்து வருகின்றனர்.