மோசமான அங்கன்வாடி கட்டடம் குழந்தைகள் பாதுகாப்பு கேள்விக்குறி

ஓசூர், மோசமான அங்கன்வாடி கட்டடத்தால், குழந்தைகளின் பாதுகாப்பு கேள்விக்குறியாகி உள்ளது.கிருஷ்ணகிரி மாவட்டம், ஓசூர் ஏரித்தெரு சாலையோரம் அங்கன்வாடி மையம் உள்ளது. இங்கு ஏரித்தெரு, சாந்தி நகர், மேல்கொல்லர் தெரு, வேணுகோபால் தெரு, வாணியர் தெருவை சேர்ந்த, 35க்கும் மேற்பட்ட குழந்தைகள் ஆரம்ப கல்வி கற்கின்றனர். மையத்திற்கு நிரந்தர அங்கன்வாடி பணியாளர் இல்லை. 30 ஆண்டுக்கு முன் கட்டப்பட்ட கட்டடம் மிகவும் மோசமாக உள்ள போதும், அதை முறையாக சீரமைக்காமல் உள்ளனர். அதனால், எப்போது வேண்டுமானாலும் இடிந்து விழும் நிலையில் உள்ளது. அதற்குள் குழந்தைகள் பாதுகாப்பின்றி அமர வைக்கப்பட்டுள்ளனர். மேலும், குழந்தைகளுக்காக கட்டப்பட்ட கழிவறை பணி பாதியிலேயே நிறுத் தப்பட்டுள்ளது. இயற்கை உபாதைகளை கழிக்க, குழந்தைகள் தங்கள் வீடுகளுக்கு செல்ல வேண்டியுள்ளது. அங்கன்வாடி முன் உள்ள ஏரித்தெரு சாலையோரம், சாக்கடை கால்வாய் துார்வாரப்படாமல் பிளாஸ்டிக் கழிவுகள் விழுந்து அடைத்துள்ளது.அங்கன்வாடி மையத்திற்கு வாரந்தோறும் புதன்கிழமை தடுப்பூசி மற்றும் மருத்துவ பரிசோதனை செய்ய, கர்ப்பிணிகள் வருகின்றனர். எனவே, ஆபத்தான நிலையில் உள்ள கட்டடத்தை, இடித்து விட்டு, புதிதாக கட்ட மாவட்ட நிர்வாகம் நடவடிக்கை எடுக்க வேண்டும்.