வங்கி கடன் கட்டுவதை தவிர்க்க கணவரை கொன்ற மனைவி கைது

கிருஷ்ணகிரி: வங்கி கடன் கட்டுவதை தவிர்க்க, கணவரை கொன்று நாடகமாடிய மனைவி உட்பட மூவர் கைது செய்யப்பட்டனர். கிருஷ்ணகிரி மாவட்டம், எண்ணேகொள்புதுாரைச் சேர்ந்தவர் ரகுபதி, 40; விவசாயி. நவ., 21ம் தேதி, பத்தலப்பள்ளி அருகே டூ - வீலரில் சென்ற போது, அவர் மீது கார் மோதியதாக விபத்து வழக்கு பதியப்பட்டது. படுகாயமடைந்து, தர்மபுரி அரசு மருத்துவமனையில் சிகிச்சை பெற்ற அவர், நவ., 23ம் தேதி இறந்தார். அவரது சாவில் சந்தேகம் இருப்பதாக உறவினர் நாகராஜ், 54, அளித்த புகாரின்படி, குருபரப்பள்ளி போலீசார் விசாரித்தனர். அதில், ரகுபதி பெயரில், 28 லட்சம் ரூபாய் வீட்டு கடன், 18 லட்சம் ரூபாய் நகை கடன், 20 லட்சம் ரூபாய் லாரி கடன் என, 66 லட்சம் ரூபாய் வங்கி கடன் வாங்கி, அவரது மைத்துனர் ராஜா பெற்றுள்ளார். கடனை கட்டாமல் இருக்க முடிவு செய்து, விபத்து நடந்தது போல ரகுபதியை கார் ஏற்றிக் கொன்ற ராஜா, 35, அவரது கூட்டாளி சரத்குமார், 27, ஆகியோரை நேற்று முன்தினம் போலீசார் கைது செய்தனர். தொடர் விசாரணையில், ரகுபதி பெயரில் வங்கி கடன் வாங்குவது, அதன்பின் அவரை கொன்று கடன் தொகையை கட்டாமல் ஏமாற்றுவது என திட்டம் தீட்டியது அனைத்தும், அவரது மனைவி சந்திரா, 37, தான் என்பதும் தெரிந்தது. இதையடுத்து, அவரையும் நேற்று போலீசார் கைது செய்தனர்.