ராமநாதபுரத்தில் மழை நீருடன் கலந்த கழிவு நீர்... மக்கள் அவதி: குடியிருப்புகள் அருகே தேங்கியதால் சுகாதாரக்கேடு

ராமநாதபுரம்:ராமநாதபுரம் நகர், புறநகர் பகுதியில் கழிவுநீர் செல்வதற்கு பிரத்யேக கால்வாய் முறையாக பராமரிக்காததால் சில இடங்களில் மூடிகள் திறந்தும், உடைந்தும் காணப்படுகிறது. தொடர் மழையால் சாலையில் தேங்கும் மழைநீர் கழிவுநீருடன் கலந்து ரோட்டில் தேங்கி கிடக்கிறது. துர்நாற்றத்தினால் மக்கள் நோய்தொற்று அச்சத்தில் உள்ளனர்.ராமநாதபுரம் நகராட்சி 33 வார்டுகளில் பாதாள சாக்கடை சரிவர பராமரிப்பு இல்லாமல் ரோடு, வீதிகளில் கழிவுநீர் அடிக்கடி ஓடுவது வாடிக்கையாகியுள்ளது. அதேபோல் பட்டணம்காத்தான் ஊராட்சிக்குட்பட்ட ஓம்சக்தி நகர், பாரதிநகர், நேருநகர் உள்ளிட்ட பகுதியில் ரோடு குண்டும் குழியுமாக காணப்படுவதால் மழைநீர் குளம் போல் தேங்குகிறது. இந்நிலையில் கடந்த இருநாட்களாக தொடர் மழைகாரணமாக மேற்கண்ட இடங்களில் மழைநீருடன் கழிவுநீர் கலந்து தெருக்கள், குடியிருப்புகள், மாணவர்கள் விடுதி அருகே குளம்போல தேங்கியுள்ளன. ரோட்டில் ஆறாக ஓடுவதால் மக்கள் நடந்து கூட செல்ல முடியாமல் சிரமப்படுகின்றனர். அம்மா பூங்கா அருகே உள்ள விடுதி முன்பு மழைநீரும், கழிவுநீரும் கலந்து குளம்போல் தேங்கியுள்ளது. தையல்காரத்தெரு, தெற்கு செட்டியார் தெரு ஆகிய இடங்களில் கழிவுநீர் ஆறாக ரோட்டில் ஓடுகிறது. இவ்வழியாக நடந்துசெல்லும் மக்களுக்கு சிரங்கு, காய்ச்சல் போன்ற நோய்கள் வர வாய்ப்புள்ளது. இதுதொடர்பாக தெரிவித்தும் நகராட்சி பணியாளர்கள் கண்டுகொள்ளவில்லை என மக்கள் புகார் தெரிவிக்கின்றனர். எனவே தெருக்களில் மழைநீருடன் தேங்கிய கழிவுநீரை உடன் அகற்றி குழாய்களை சீரமைக்க நகராட்சி, ஊராட்சி நிர்வாகத்தினர் நடவடிக்கை எடுக்க வேண்டும். அதற்கு கலெக்டர் சிம்ரன்ஜீத் சிங் காலோன் உத்தரவிட வேண்டும்.