டூவீலர்கள் திருட்டு அதிகரிப்பு

தேனி: மாவட்டத்தில் கடந்த சில நாட்களாக டூவீலர்கள் திருட்டு சம்பவங்கள் அதிகரித்தள்ளன. போலீஸ் ஸ்டேஷன்களில் புகார் அளித்தும் நடவடிக்கை இல்லை என டூவீலர்களை இழந்தவர்கள் புலம்பி வருகின்றனர். மாவட்டத்தில் கோடை விடுமுறையில் திருவிழாக்கள் அதிகம் நடைபெறும். அப்போது அதிக அளவில் டூவீலர்கள் திருடு போகும். ஆனால், தற்போது டூவீலர்கள் திருடு போவது அதிகரித்துள்ளது. அதிலும் நகர் பகுதிகளில் டூவீலர்கள் திருடு போவது அதிகரித்துள்ளது. கடந்த வாரம் தேனியில் டூவீலரை திருடி சென்ற போது வாலிபரை டூவீலர் உரிமையாளர்கள் பிடித்து போலீசில் ஒப்படைத்தனர். சில இடங்களில் டூவீலர்களை இழந்தவர்கள் டூவீலர்கள் திருடு போன இடங்களுக்கு அருகே உள்ள இடங்களில் இருந்து சி.சி.டி.வி., வீடியோ பதிவுகள் எடுத்து வழங்கினாலும், போலீஸ் ஸ்டேஷன்களில் வழக்கு பதிவு செய்வதில் இழுபறி நீடிக்கிறது. போலீஸ் சார்பில் பல்வேறு இடங்களில் கேமராக்கள் பொருத்தப்பட்டிருந்தாலும், டூவீலர்களை திருடி செல்பவர்களை பிடிப்பது குதிரை கொம்பாக உள்ளது. போலீசார் வைத்துள்ள கண்காணிப்பு கேமராக்கள் செயல்படுவதை உறுதி செய்ய வேண்டும். பழுதடைந்த கேமராக்களை சீரமைக்க வேண்டும். டூவீலர்கள் திருட்டு சம்பவத்தில் ஈடுபடும் சமூக விரோதிகளை பிடித்து நடவடிக்கை எடுக்க வேண்டும் என சமூக ஆர்வலர்கள் கோரிக்கை விடுத்துள்ளனர்.