வெண்டைக்காய் விதை ஆய்வு வேளாண் துறை ஆலோசனை

திருவள்ளூர்:திருவள்ளூர் மாவட்ட வேளாண் விதை பரிசோதனை ஆய்வக வேளாண் அலுவலர் சுகுணா விடுத்துள்ள செய்திக்குறிப்பு:வெண்டைக்காய் அனைவராலும் விரும்பி உண்ணப்படும் காய்கறி பயிர். இதில் வைட்டமின் 'ஏ' அதிகமாக உள்ளது. வெண்டைக்காய் எவ்வித மண் வகையிலும் பயிரிடலாம். ஜூன் - ஆக., மற்றும் பிப்., - மார்ச் ஆகிய பருவங்களில் நன்கு வளரும். இரண்டரை ஏக்கருக்கு 7.5 கிலோ விதை தேவை.வெண்டைக்காயில் காய் துளைப்பான் தாக்குதலை கட்டுப்படுத்த இன கவர்ச்சி பொறி, 12 வைக்க வேண்டும். கார்பரில் நனையும் துாள், 1 லிட்டர் தண்ணீரில் 2 கிராம் கலந்து தெளிக்க வேண்டும். மஞ்சள் நரம்பு தோல் நோயை ஏற்படுத்தும் வெள்ளை ஈக்களை, வேம்பு எண்ணெய், 1 லிட்டர் நீரில் 2 மில்லி கலந்து தெளித்தால் கட்டுப்படுத்தலாம். பயிரிட்டு, 45 நாட்களில் காய்கள் அறுவடைக்கு வந்து விடும். இரண்டரை ஏக்கருக்கு, 12,000 - 15,000 கிலோ காய்கள் கிடைக்கும்.வெண்டை காய்கறி விதை விதைப்பதற்கு முன், அதை பரிசோதனை செய்து, ஈரப்பதம் 10 சதவீதம், புறத்துாய்மை 99 சதவீதம் மற்றும் குறைந்தபட்ச முளைப்புத்திறன், 65 சதவீதம் இருப்பதை உறுதி செய்ய வேண்டும்.இவ்வாறு அதில் கூறப்பட்டுள்ளது.