கட்டட கழிவுகளால் நிரம்பி வழியும் விளையாட்டு மைதானம்

திருவாலங்காடு:திருவாலங்காடு ஒன்றியம் பெரிய களக்காட்டூர் ஊராட்சிக்குட்பட்டது சின்னகளக்காட்டூர் கிராமம். இங்கு சிற்றேரி எதிரே விளையாட்டு உபகரணங்களுடன் கூடிய விளையாட்டு மைதானம், 2013-- 14ம் ஆண்டு ஒன்றிய நிதி வாயிலாக அமைக்கப்பட்டது.இந்த விளையாட்டு மைதானத்தை இப்பகுதியைச் சேர்ந்த சிறுவர் - சிறுமியர் மற்றும் இளைஞர்கள் விளையாட பயன்படுத்தி வந்தனர். இந்நிலையில், ஓராண்டாக இந்த விளையாட்டு உபகரணங்கள் பயன்படுத்தாத நிலையில் தற்போது துருப்பிடித்தும் மைதானத்தில் செடி முளைத்து புதராக காட்சியளிக்கிறது.மேலும் கட்டடக்கழிவுகள் கொட்டப்பட்டு மைதானம் மறைக்கப்பட்டுள்ளது. இதனால் சிறுவர் -- சிறுமியர் விளையாட இடம் இல்லாமல் சிரமப்படுகின்றனர். இதனால் சிறுவர்களின் விளையாட்டு திறன் பாதிக்கப்படுகிறது.எனவே விளையாட்டு மைதானத்தை ஆக்கிரமித்துள்ள செடிகள், கட்டட கழிவுகளை அகற்றி சீரமைக்க திருவாலங்காடு ஒன்றிய அதிகாரிகள் நடவடிக்கை எடுக்க வேண்டும் என இளைஞர்கள் வேண்டுகோள் விடுத்துள்ளனர்.