ஒருங்கிணைந்த தொழில்நுட்ப தேர்வு மாவட்டத்தில் 361 பேர் பங்கேற்பு

திருப்பூர்: திருப்பூரில் நாளை நடைபெறும் தொழில்நுட்ப பணிகள் தேர்வை, 361 பேர் எழுதுகின்றனர். டி.என்.பி.எஸ்.சி.,யின் ஒருங்கிணைந்த தொழில்நுட்ப பணிகளுக்கான தேர்வு, திருப்பூர் மாவட்டத்தில் நாளை (16 ம் தேதி) நடைபெற உள்ளது. பல்லடம் -திருச்சி ரோடு கே.என்., புரத்திலுள்ள அம்பாள் புரபசனல் குரூப் ஆப் இன்ஸ்டிடியூஷன் மற்றும் திருப்பூர் குமரன் கல்லுாரி ஆகிய இரு மையங்களிலும், காலை மற்றும் மதியம் தேர்வு நடைபெறுகிறது; மொத்தம் 361 பேர் தேர்வு எழுதுகின்றனர். இது குறித்து, கலெக்டர் மனிஷ் நாரணவரே அறிக்கை: ஒருங்கிணைந்த தொழில்நுட்ப பணிகள் தேர்வு ஏழுதுவோர், கட்டாயம் ஹால்டிக்கெட் கொண்டுவர வேண்டும். காலையில் தேர்வு எழுதுவோர், காலை, 8:30 மணிக்குள்ளாகவும், மதிய தேர்வர்கள், மதியம், 1:30 மணிக்குள் தேர்வு மையங்களில் இருக்க வேண்டும். காலை, 9:00 மணி, மதியம் 2:00 மணிக்கு மேல் தேர்வர்கள் அனுமதிக்கப்படமாட்டார்கள். தேர்வு மையத்துக்கு வந்து செல்ல ஏதுவாக சிறப்பு பஸ்கள் இயக்கப்படுகிறது; தடையில்லாத மின்சாரம் வழங்கவும், அவசர தேவைகளுக்கு மருத்துவ குழுக்களும் தயார் நிலையில்இருப்பர். தேர்வர்கள் தங்கள் புகைப்பட அடையாளத்துக்காக ஏதேனும் ஒரு அடையாள அட்டை எடுத்துவரவேண்டும். மொபைல்போன், கம்ப்யூட்டர், டிஜிட்டல் வாட்ச் கொண்டுவர அனுமதி கிடையாது. இவ்வாறு அவர் தெரிவித்துள்ளார்.