வேளாண் அதிகாரி எச்சரிக்கை

திருப்பூர் : திருப்பூர் மாவட்ட வேளாண் இணை இயக்குனர் (பொறுப்பு) கிருஷ்ண வேணி வெளியிட்டுள்ள அறிக்கை:திருப்பூர் மாவட்டத்திலுள்ள அனைத்து வட்டாரங்களிலும் பரவலாக, பருவமழை பெய்துவருகிறது. நடப்பு பருவத்தில் சாகுபடி மேற்கொள்ளும் பயிர்களுக்கு தேவையான அனைத்து உரங்களும், தனியார் விற்பனை நிலையங்கள், தொடக்க வேளாண் கூட்டுறவு சங்கங்களில் இருப்பு வைக்கப்பட்டு, விற்பனை செய்யப்பட்டு வருகிறது.மாவட்டத்தில், யூரியா 3,265 டன்; டி.ஏ.பி., 562 டன்; பொட்டாஷ், 1,584 டன்; சூப்பர் பாஸ்பேட் 865; காம்ப்ளக்ஸ் 5,963 டன் இருப்பு உள்ளது. உரம் இருப்பு மற்றும் விற்பனை குறித்து, உர கண்காணிப்பு குழுவினர் ஆய்வு செய்துவருகின்றனர். நிர்ணயிக்கப்பட்ட விலையைவிட கூடுதல் விலைக்கு உரங்களை விற்பனை செய்யக்கூடாது; மீறினால் உர விற்பனை உரிமம் ரத்து செய்யப்படும்.இவ்வாறு, அவர் தெரிவித்துள்ளார்.