நெடுஞ்சாலை துறை கலந்தாய்வு கூட்டம்

விழுப்புரம்: வடகிழக்கு பருவமழை மற்றும் டிட்வா புயல் தொடர்பாக முன்னெச்சரிக்கை பணிகள் குறித்து, விழுப்புரம் நெடுஞ்சாலைத் துறை அலுவலகத்தில் கலந்தாய்வுக் கூட்டம் நடந்தது. விழுப்புரம், நெடுஞ்சாலை வட்டத்திற்கான கண்காணிப்பு அலுவலராக நியமிக்கப்பட்ட தேசிய நெடுஞ்சாலைத்துறை தலைமை பொறியாளர் பன்னீர்செல்வம் தலைமை தாங்கினார். கட்டுமானம் மற்றும் பராமரிப்பு அலகைச் சேர்ந்த விழுப்புரம் கண்காணிப்பு பொறியாளர் செந்தில்குமார், துணை கண்காணிப்பு பொறியாளர் சுந்தரி, விழுப்புரம் கோட்டப் பொறியாளர் உத்தண்டி, கடலுார் கோட்டப் பொறியாளர் சிவகுமார், விருத்தாசலம் கோட்ட பொறியாளர் சிவசேனா, தேசிய நெடுஞ்சாலைத்துறை கோட்ட பொறியாளர் அம்பிகா மற்றும் பொறியாளர்கள், சார்நிலை அலுவலர்கள் பங்கேற்றனர். கூட்டத்தில், தலைமை பொறியாளர் பேசுகையில், 'விழுப்புரம் மற்றும் கடலுார் மாவட்டத்தில், கனமழைக்கு இந்திய வானிலை மையம் எச்சரிக்கை விடுத்துள்ளது. கனமழை பெய்யும் போது, நெடுஞ்சாலைத் துறை கட்டுப்பாட்டில் உள்ள சாலைகளில் சீரான போக்குவரத்து நடை பெறுவதை உறுதி செய்ய வேண்டும். அதற்கு தேவையான ஏற்பாடுகளை தொய்வின்றி பொறியாளர்கள் மேற்கொள்ள வேண்டும். மேலும், வடகிழக்கு பருவமழை காலங்களில் சாலையின் குறுக்கே கட்டப்பட்டுள்ள பாலங்களில் தண்ணீர் தேங்காமல் தடைமின்றி செல்வதற்கு நடவடிக்கைகளை மேற்கொள்வதுடன், சரலைகள் மற்றும் பாலங்களில் மழைநீர் தேங்காமல் கண்காணித்திட வேண்டும். மரங்கள் விழுந்தால் உடனுக்குடன் அப்புறப்படுத்த தேவையான கருவி தளவாடங்கள் மற்றும் தேவையான எந்திரங்கள் மற்றும் தேவையான ஆட்களுடன் தயார் நிலையில் இருக்க வேண்டும். சாலை அரிப்புகள் ஏற்பட்டால், மணல் மூட்டைகள், சவுக்கு கம்புகள் மற்றும் ஜல்லிகள் மூலம் உடனுக்குடன் சரி செய்திட வேண்டும்' என்றார்.