கலெக்டர் அலுவலகத்தில் கூரை பெயர்ந்து பலவீனமாகும் வாகன நிறுத்துமிடங்கள்

விருதுநகர்: விருதுநகர் பழைய கலெக்டர் அலுவலக வளாகத்தில் உள்ள வாகன நிறுத்துமிடங்களின் கூரைகள் பெயர்ந்து பலவீனமாகி விட்டன. தற்போது மழைக்காலம் என்பதால் விழுந்து விடும் அபாயம் உள்ளது. விருதுநகர் பழைய கலெக்டர் அலுவலகம் 25 ஆண்டுகள் பழமையானது. இதனால் தான் தற்போது புதிய கலெக்டர் அலுவலகம் கட்டப்பட்டு 2024 நவ. 10ல் திறந்து வைக்கப்பட்டது. இந்நிலையில் பழைய கலெக்டர் அலுவலகத்திற்கு சி.இ.ஓ., அலுவலகம், கூட்டுறவுத்துறை அலுவலகங்கள் இடமாற்றம் செய்யப்பட்டன. இவற்றில் போதிய அளவில் துாய்மை பணி நடக்கவில்லை என்ற குற்றச்சாட்டு இருந்து வருகிறது. அதே போல் இதில் சிதிலமடையும் நிலையில் உள்ள பழைய கட்டடடங்களில் புனரமைப்பு பணிகள் செய்ய வேண்டும் என கோரிக்கை எழுந்து வருகிறது. குறிப்பாக வாகன நிறுத்துமிடங்களில் கூரைகள் பெயர்ந்துள்ளன. மழைநீரின் ஈரப்பதம் பிடித்து விழுந்து விடும் அபாயம் உள்ளது. இவற்றில் பூச்சு பூசி புனரமைத்தால் அசம்பாவிதம் தவிர்க்கப்படும். இன்னும் பலர் கார்களையும், டூவீலர்களையும் நிறுத்துகின்றனர். அவ்வழியாக செல்லும் மக்கள் மழை, வெயிலுக்கு ஒதுங்குகின்றனர். எனவே மாவட்ட நிர்வாகம் உரிய நடவடிக்கை எடுக்க வேண்டும்.