ஆக.,16ல் அதிமுக செயற்குழு கூட்டம்: என்னென்ன தீர்மானங்களை நிறைவேற்ற திட்டம்?

சென்னை: ஆகஸ்ட் 16ல் நடக்க உள்ள அதிமுக செயற்குழு கூட்டத்தில் நிறைவேற்றப்பட உள்ள தீர்மானங்கள் பற்றிய முக்கிய தகவல்கள் வெளியாகியுள்ளன.அதிமுக.,வின் அவசர செயற்குழுக் கூட்டம் ஆக.,16ம் தேதி நடைபெறும் என்று அதிமுக பொதுச்செயலாளர் இபிஎஸ் அறிவித்துள்ளார். அதிமுக அவைத் தலைவர் தமிழ்மகன் உசேன் தலைமையில் நடைபெறும் இந்த கூட்டத்தில் சுமார் 300 செயற்குழு உறுப்பினர்கள் வரை கலந்து கொள்வார்கள் என எதிர்பார்க்கப்படுகிறது. இந்த செயற்குழு கூட்டத்தில் நிறைவேற்றப்பட உள்ள தீர்மானங்கள் பற்றிய முக்கிய தகவல்கள் வெளியாகியுள்ளன.அதாவது, தமிழகத்தில் நிலவும் சட்டம் ஒழுங்கு பிரச்னைகள், போதைப்பொருள் புழக்கம் உள்ளிட்ட பிரச்னைகளை மையப்படுத்தி, திமுக அரசை கண்டித்து பல்வேறு தீர்மானங்களை நிறைவேற்ற அதிமுக திட்டமிட்டுள்ளது. அதேபோல், அதிமுக கட்சி ரீதியாக உள்ள மாவட்டங்களை மேலும் பிரிக்கவும், இரு தொகுதிகளுக்கு ஒரு மாவட்ட செயலாளர் என விதிமுறை நடைமுறைப்படுத்தவும் தீர்மானிக்கப்பட இருக்கிறது.மேலும், 2026 தேர்தலுக்காக ஆலோசனை குழு அமைத்தல், கட்சியில் இளைஞர்களை அதிகளவில் சேர்த்தல், உட்கட்சி தேர்தலை நடத்துவது, சசிகலா, ஓபிஎஸ், டிடிவி தினகரன் போன்ற துரோகம் செய்தவர்களை கட்சியில் சேர்ப்பதில்லை, டிசம்பரில் பொதுக்குழு கூட்டம் போன்ற தீர்மானங்களும் நிறைவேற்றப்பட இருப்பதாக தகவல் வெளியாகியுள்ளது.