கோவை: கோவை கல்லூரி மாணவி கூட்டு பாலியல் வன்கொடுமை சம்பவத்தில் கைது செய்யப்பட்ட 3 பேர் மீது குண்டர் சட்டம் பாய்ந்துள்ளது.கடந்த நவ.2ம் தேதி, கோவை விமான நிலையம் அருகில் உள்ள காட்டுப்பகுதியில் கல்லூரி மாணவி ஒருவரை கடத்திய 3 பேர் கொண்ட கும்பல் கூட்டு பாலியல் வன்கொடுமை செய்தது. பெரும் அதிர்ச்சியை ஏற்படுத்திய இந்த சம்பவத்தில் சிவகங்கை மாவட்டத்தைச் சேர்ந்த சகோதரர்கள் கருப்பசாமி (எ)சதீஷ், கார்த்திக் (எ) காளிஸ்வரன், தவசி (எ) குணா ஆகியோர் கைது செய்யப்பட்டனர்.தேடுதல் வேட்டையின் போது இவர்கள் 3 பேரையும் போலீசார் துப்பாக்கியால் கால்பகுதியில் சுட்டு பிடித்தனர். கோவை மத்திய சிறையில் உள்ள அவர்கள் 3 பேர் மீது 50 பக்கம் கொண்ட குற்றப்பத்திரிகை தாக்கல் செய்யப்பட்டு உள்ளது.இவர்கள் 3 பேர் மீதும், திருப்பூர், கோவையின் பல்வேறு பகுதிகளில் கொலை முயற்சி, திருட்டு,வழிப்பறி என பல வழக்குகள் நிலுவையில் உள்ளதும், போலீசார் விசாரணையில் தெரிய வந்தது. இந் நிலையில், தொடர் குற்றங்களில் ஈடுபட்டதால், அவர்கள் 3 பேர் மீதும் தற்போது குண்டர் தடுப்புச் சட்டம் பாய்ந்துள்ளது. இதற்கான உத்தரவை கோவை மாநகர போலீஸ் கமிஷனர் சரவண சுந்தர் பிறப்பித்து உள்ளார். இந்த அதிகாரப்பூர்வ உத்தரவானது, கோவை மத்திய சிறை நிர்வாகத்துக்கு அனுப்பி வைக்கப்பட்டு உள்ளது.
4 hour(s) ago | 1
6 hour(s) ago | 4
7 hour(s) ago | 8
9 hour(s) ago | 2