சிப்ஸ் பயன்படுத்தி விரிசல் தடுக்கலாம்!  

'கனவு இல்லம்' தொடர்பான, வாசகர்களின் பல்வேறு கேள்விகளுக்கு பதிலளிக்கிறார், கோயமுத்துார் மாவட்ட அனைத்து கட்டுமான பொறியாளர் சங்க இணை செயலாளர் பிரேம்குமார் பாபு. * கோழி வலை கட்டி வேலை செய்யும் போது, கலவை மட்டும் கலந்து பூசினால் போதும் என்கிறார்கள்; அப்படி செய்யலாமா? --சரவணன், துடியலுார். கோழி வலை கட்டி வேலை செய்யும் போது, கலவையுடன் 'சிப்ஸ்' என்கிற குருணை ஜல்லியை சிறிது சேர்த்து பயன்படுத்த வேண்டும். அவ்வாறு செய்யும் போது விரிசல்கள் வருவதை தடுக்கலாம். கலவை மட்டும் கலந்து பூசுவதை தவிர்க்கவும்.* கிச்சனில் ஜன்னல் வைக்கும் போது, எவ்வளவு உயரத்தில் வைக்க வேண்டும்? --தினேஷ், அன்னுார்.கிச்சனில் ஜன்னல் வைக்கும் போது, வீட்டின் தரை மட்டத்திலிருந்து நான்கு அடி உயரத்திலும், டேபிள் டாப்பிலிருந்து ஒரு அடி உயரத்திலும் அமைக்க வேண்டும்.* காம்பவுண்ட் சுவற்றின் மேல் மட்டத்தில், 'சில் கான்கிரீட்' போட வேண்டுமா? -அர்ஜுனன், காளப்பட்டி. கண்டிப்பாக போட வேண்டும். இது, காம்பவுண்ட் சுவரின் உறுதித்தன்மையை அதிகப்படுத்துவதுடன், விரிசல்கள் வராமல் தடுக்க உதவுகிறது. இம்முறையை வீட்டின் கைப்பிடிச் சுவற்றிலும் பயன்படுத்தலாம்; மிகவும் நல்லது.* காலம் போஸ்ட் மற்றும் எலக்ட்ரிகல் பைப் ஜாயின்ட்களில் விரிசலை தடுப்பது எப்படி? -சுகுமாரன், கணபதி. காலம் ஜாயின்ட்கள், பீம் ஜாயின்ட்கள் மற்றும் எலக்ட்ரிக்கல் பைப் உள்ள இடங்களில், பைபர் மெஷ் பொருத்தி, அதன் மீது பூச்சு பூச வேண்டும். இது, அனைத்து ஹார்டுவேர் கடைகளிலும் கிடைக்கக்கூடிய ஒன்று. அவ்வாறு செய்யும்போது, விரிசல்களை கண்டிப்பாக தவிர்க்கலாம்.

* மொட்டை மாடியில் இருந்து வரும் வெப்பத்தை எவ்வாறு தடுக்கலாம்? -

--காளிச்சாமி, குனியமுத்துார். மொட்டை மாடியில் சிப்ஸ் தளம் அமைத்தவுடன், அதன் மேல் கூல்ருபிங் டைல்ஸ் அமைத்து மேலிருந்து வரும் வெப்பத்தை குறைக்கலாம். டைல்ஸ் ஒட்டும் பொழுது, டைல்க்கிடையே 3 எம்.எம்., இடைவெளியை வைத்து ஒட்டி, அதன் இடைவெளிக்கு எப்பாக்ஸி என்னும் மெட்டீரியல் கொண்டு, பேக்கிங் செய்வதன் வாயிலாக, நீர் உட்புகுவதை தடுக்கலாம். அதேபோல், டைல்ஸ் பெயர்ந்து வருவதையும் தடுக்கலாம். கூலிங் பெயின்ட் அடித்தும் வெப்பம் குறைக்கலாம்.