ரூ.500 கோடி வசூலைக் கடந்த 'கல்கி 2898 ஏடி'

பிரபாஸ், தீபிகா படுகோனே மற்றும் பலர் நடிப்பில் கடந்த வாரம் வெளிவந்த 'கல்கி 2898 ஏடி' படம் நான்கு நாட்களில் ரூ.500 கோடி வசூலைக் கடந்துள்ளது. இது குறித்த அறிவிப்பை படத்தயாரிப்பு நிறுவனம் நேற்றிரவு அதிகாரப்பூர்வமாக அறிவித்தது.

அந்த 500 கோடியில் அமெரிக்க வசூல் மட்டுமே 83 கோடி. அங்கு 10 மில்லியன் யுஎஸ் டாலர் வசூலித்து புதிய சாதனையைப் படைத்துள்ளது. முதல் வார இறுதியில் வேறு எந்த ஒரு இந்தியப் படமும் இந்த அளவிற்கு வசூலித்ததில்லை என அங்கு படத்தை வெளியிட்டுள்ள நிறுவனம் தெரிவித்துள்ளது.

அமெரிக்கா பாக்ஸ் ஆபீஸ் வசூலில் இப்படம் பெறும் வசூல் குறித்து ரசிகர்களுக்கு நன்றி தெரிவித்து படத்தின் இயக்குனர் நாக் அஸ்வின் வீடியோ ஒன்றையும் வெளியிட்டுள்ளார்.

'பாகுபலி 2' படத்திற்குப் பிறகு பிரபாஸிற்கு இந்தப் படம் பெரிய வசூலை பெற்றுத் தரும் என்ற நம்பிக்கை டோலிவுட்டில் ஏற்பட்டுள்ளது.