‛7ஜி ரெயின்போ காலனி 2' பர்ஸ்ட் லுக் போஸ்டர் வெளியானது

கடந்த 2004ம் ஆண்டில் செல்வராகவன் இயக்கத்தில் ரவி கிருஷ்ணா, சோனியா அகர்வால் நடிப்பில் வெளியான படம் 7ஜி ரெயின்போ காலனி. இந்தப்படம் தெலுங்கில் ‛7ஜி பிருந்தாவன் காலனி' என்ற பெயரில் வெளியானது. மிகப்பெரிய அளவில் வெற்றி பெற்ற இந்த படத்திற்கு யுவன் சங்கர் ராஜா இசை அமைக்க, ஏ.எம்.ரத்னம் தயாரித்திருந்தார்.

இந்த நிலையில் தற்போது மீண்டும் 7ஜி ரெயின்போ காலனி படத்தை தமிழ், தெலுங்கு என இரண்டு மொழிகளிலும் இயக்கப்போகிறார் செல்வராகவன். ரவி கிருஷ்ணாவே மீண்டும் நாயகனாக நடிக்க, அவருக்கு ஜோடியாக மலையாள நடிகை அனஸ்வர ராஜன் நடிக்கிறார். யுவன் ஷங்கர் ராஜா இசையமைக்கிறார். 40 சதவீத படப்பிடிப்பு முடிந்த நிலையில் படம் பாதியில் நின்றதாக தகவல் வந்தது.

இந்நிலையில் புத்தாண்டை முன்னிட்டு இன்றைய தினம் இப்படத்தின் பர்ஸ்ட் லுக் போஸ்டரை தனது எக்ஸ் பக்கத்தில் வெளியிட்டுள்ளார் செல்வராகவன். அதேபோல் 7ஜி பிருந்தாவன் காலனி -2 என்ற தெலுங்கு பதிப்பின் போஸ்டரும் வெளியாகியுள்ளது.