வலிமை அப்டேட்- கேட்டு முருகனிடம் வேண்டுகோள் வைத்த அஜித் ரசிகர்கள்

நேர்கொண்ட பார்வை படத்தை அடுத்து மீண்டும் போனி கபூர் தயாரிப்பில் எச்.வினோத் இயக்கும் வலிமை படத்தில் நடித்து வருகிறார் அஜித். நாயகியாக ஹூமா குரேஷி, வில்லனாக கார்த்திகேயா நடிக்க, யுவன் சங்கர் ராஜா இசையமைக்கிறார். படப்பிடிப்பு கிட்டத்தட்ட இறுதிக்கட்டத்தை நெருங்கிவிட்டது. ஆனால் இதுவரை படத்தின் பர்ஸ்ட் லுக்கோ, அல்லது படம் சம்பந்தப்பட்ட எந்த ஒரு அப்டேட்டும் படக்குழு தரப்பிலிருந்து வெளியாகவில்லை. அவ்வப்போது படப்பிடிப்பு தளத்தில் எடுக்கப்பட்ட போட்டோக்கள் மட்டுமே வெளியாகின.

படம் பற்றி ஏதாவது ஒரு அப்டேட் கொடுங்கள் என ரசிகர்கள் நச்சரித்து வருகிறார்கள். ஆனால் படக்குழுவோ தொடர்ந்து கப்-சிப் என்ற மனநிலையில் தான் உள்ளனர். சில ஊர்களில் போஸ்டர் அடித்து படத்தின் அப்டேட் என ரசிகர்கள் நச்சரித்தனர். இப்போது ஒரு படி மேலே போய் கடவுளிடம் வேண்டி வருகிறார்கள் அஜித் ரசிகர்கள்.

திருச்செந்தூர் முருகன் கோயிலில் வழிபாடு நடத்தி விட்டு, முருகனும், அஜித்தும் இடம்பெற்ற பேனரை ஏந்தியபடி, பிளீஸ்... வலிமைக்கு அப்டேட் கொடுக்க சொல்லுங்க முருகா -என்று முருகனிடம் வேண்டுகோள் வைத்து வருகிறார்கள். அந்த போட்டோக்களையும் சோசியல் மீடியாவில் வெளியிட்டுள்ளனர். இப்படிப்பட்ட ரசிகர்களை என்னவென்று சொல்வது.?!