சூளாங்குறிச்சி வரதராஜ பெருமாள் கோவிலில் திருக்கல்யாண உற்சவம்

ரிஷிவந்தியம்: சூளாங்குறிச்சி வரதராஜ பெருமாள் கோவிலில் புரட்டாசி மாத இரண்டாவது சனிக்கிழமையையொட்டி திருக்கல்யாண உற்சவமும், சுவாமி வீதியுலாவும் நடந்தது.

ரிஷிவந்தியம் அடுத்த சூளாங்குறிச்சி ஸ்ரீதேவி, பூதேவி சமேத வரதராஜ பெருமாள் கோவிலில் புரட்டாசி மாத சனிக்கிழமை தினங்களில் சுவாமிக்கு சிறப்பு அபிஷேகம் நடத்தப்படுவது வழக்கம். இந்நிலையில், இரண்டாவது சனிக்கிழமையையொட்டி நேற்று முன்தினம் காலை மூலவர் சுவாமிக்கு நல்லெண்ணெய், பால், தயிர், தேன், மஞ்சள் தூள், இளநீர், பஞ்சாமிர்தம், சந்தனம், பன்னீர் மற்றும் சுத்தமான நறுமண நீர் கொண்டு திருமஞ்சன அபிஷேகம் செய்யப்பட்டது. தொடர்ந்து, பல வண்ண மலர்களால் அலங்கரித்து மகா தீபாராதனை காண்பிக்கப்பட்டு, பொதுமக்களுக்கு அன்னதானம் வழங்கப்பட்டது. தொடர்ந்து, நேற்று முன்தினம் மாலை கோவில் வளாகத்தில் சுவாமிக்கு திருக்கல்யாண உற்சவம் செய்யப்பட்டது. பின்னர் உற்சவர் ஸ்ரீதேவி, பூதேவி சமேத வரதராஜ பெருமாளை கருட வாகனத்தில் எழுந்தருளச் செய்து சுவாமி வீதியுலா நடந்தது. திரளான பக்தர்கள் பங்கேற்று சுவாமி தரிசனம் செய்தனர்.