மதத்துக்கு முக்கியத்துவம் தரும் பெண் அதிகாரி!

இ ஞ்சி டீயை உறிஞ்சியபடியே, ''எழுத்தர் பணி பார்க்கிறதா புலம்புறாங்க பா...'' என, அரட்டையை ஆரம்பித்தார் அன்வர்பாய். ''யாரை சொல்றீர் ஓய்...'' என கேட்டார், குப்பண்ணா. ''வேளாண் மற்றும் தோட்டக்கலை துறையில் உதவி அலுவலர்கள் இருக்காங்க... இவங்க, தங்களது வட்டாரத்துக்கு உட்பட்ட விளைநிலங்கள்ல அடிக்கடி ஆய்வு பண்ணுவாங்க பா... ''எந்தெந்த பருவத்தில், என்னென்ன பயிர்கள் விதைக்கணும், எப்ப மருந்து தெளிக்கணும்னு ஆலோசனைகள் தருவாங்க... நடவு துவங்கி, அறுவடை வரைக்கும் விவசாயிகளுக்கு சாகுபடி சம்பந்தமான ஆலோசனைகளும் குடுப்பாங்க பா... ''ஆனா இப்ப, விவசாய நிலங்களை, 'டிஜிட்டல்' முறையில் அளவீடு செய்து, அதுக்கான செயலியில் பதிவேற்றம் செய்றது, பிரதமர் உதவித்தொகை திட்டத்தில், விவசாயிகளை இணைக்கிறது உள்ளிட்ட எழுத்தர் பணிகளைத்தான் இவங்களுக்கு உயர் அதிகாரிகள் தர்றாங்க... ''இதனால, 'கிராமங்களில் பயிர் மருத்துவர்னே எங்களை அழைப்பாங்க... எங்களை களப்பணிக்கு அனுப்பாம, 'டேட்டா என்ட்ரி ஆப்பரேட்டர்' மாதிரி வேலை வாங்குறாங்க'ன்னு அவங்க புலம்புறாங்க பா...'' என்றார், அன்வர்பாய். ''கட்சியில பணம் தர மறுத்துட்டாவ வே...'' என்ற பெரியசாமி அண்ணாச்சியே தொடர்ந்தார்... ''பிரதமர் மோடி, சமீபத்தில் கோவையில் நடந்த விவசாயிகள் மாநாட்டுல கலந்துக்கிட்டாருல்லா... அவருக்கு பா.ஜ., சார்பில் பிரமாண்ட வரவேற்பு குடுத்தாவ வே... ''இதுல, நிறைய கிராமிய கலை நிகழ்ச்சிகளையும் நடத்தினாவ... வழக்கமா இந்த மாதிரி நிகழ்ச்சிகளுக்கு, பா.ஜ.,வின் டில்லி மேலிடத்துல இருந்து பணம் தருவாவ வே... ''இம்முறை, மோடி வரவேற்பு செலவுக்கு, 90 லட்சம் ரூபாய் செலவானதா மாவட்ட பா.ஜ., சார்பில் தலைமைக்கு கணக்கு அனுப்பியிருக்காவ... ஆனா, தலைமையிடமிருந்து பணம் எதுவும் தரல வே... ''இதுக்கு முன்னாடி, டில்லியில இருந்து குடுத்த பணத்துக்கு, மாநில தலைமை சரியா கணக்கு குடுக்காததால, இந்த முறை கைவிரிச்சிட்டாவ... இதனால, கோவை பா.ஜ., நிர்வாகிகளே அங்க, இங்க புரட்டி சமாளிச்சிருக்காவ வே...'' என்றார், அண்ணாச்சி. ''தன் மதத்துக்கு தான் முக்கியத்துவம் தர்றாங்க...'' என்றார், அந்தோணிசாமி. ''யாரை சொல்றீங்க பா...'' என கேட்டார், அன்வர்பாய். ''தமிழகத்தில் இருக்கிற எல்லா பாலிடெக்னிக் கல்லுாரியிலும் புதுசா, 'ஆன்லைன்' திறன் பயிற்சியை நடத்த, தொழில்நுட்ப கல்வி இயக்ககம் திட்டமிட்டுச்சு... இந்த பயிற்சி அளிக்கும் வாய்ப்பை, சினிமா இசையமைப்பாளர் மற்றும் நடிகரா இருக்கிறவரின் சகோதரிக்கு குடுத்திருக்காங்க... ''இவங்க ஏற்கனவே, 'ஆன்லைன்'ல மாணவ - மாணவியருக்கு ஊக்கம் தரும் பயிற்சி குடுத்துட்டு இருக்காங்க... இப்ப, பாலிடெக்னிக் மாணவர்களுக்கு பயிற்சி வழங்க ஒரு நாளைக்கு, 67,000 ரூபாய் சம்பளம் பேசியிருக்காங்க... ''மொத்தம், 10 நாள் பயிற்சிக்கு 6.70 லட்சம் ரூபாய் வருது... ஏற்கனவே, தொழில்நுட்ப கல்வி இயக்ககத்தின், 'அப்பாவி' பெண் அதிகாரி, தான் சார்ந்த மதத்துக்கு முக்கியத்துவம் தர்றதா அரசல்புரசலா பேசிக்கிறாங்க... ''ஏற்கனவே நடந்த சென்னை அண்ணா பல்கலை ஊழியர்கள் நியமனத்திலும் இந்த புகார் எழுந்துச்சு... இப்ப மாணவர்களுக்கு பயிற்சி வழங்கவும், தன் மதத்துக்கே முக்கியத்துவம் தந்திருக்கிறதா புலம்புறாங்க...'' என முடித்தார், அந்தோணிசாமி. ''திவ்யாவும், ஜெயா பாபுவும் கார்த்தாலேயே ஆபீஸ் கிளம்பிட்டாங்க பாருங்கோ...'' என, தெருவை பார்த்து முணுமுணுத்தபடியே குப்பண்ணா எழ, மற்றவர்களும் கிளம்பினர்.