பூனை!
மனிதனுடன், 10 ஆயிரம் வருடங்களுக்கு முன் பழகி, கூடவே வாழ்ந்து வருகிறது பூனை. வளர்ப்பு பிராணிகளில் மிக பிரபலமானது. உலகில், 50 கோடிக்கும் அதிகமான பூனைகள் உள்ளதாக புள்ளி விவரம் கூறுகிறது. பூனை பற்றிய சுவாரசியங்களை பார்ப்போம்...இதன் எடை, ஐந்து கிலோ வரை இருக்கும். அதிகபட்சம், 12 முதல் 15 வருடங்கள் வாழும். குறைந்த வெளிச்சத்திலும் திறனாக பார்க்க இயலும். மூக்குக்கு கீழே நேரடியாக பார்க்க இயலாது; இமை கிடையாது. மனிதனை விட கேட்கும் திறன் ஐந்து மடங்கு அதிகம். காதுகளை, 180 டிகிரி கோணத்தில் திருப்ப இயலும்.வாசனையையும் கூடுதலாக உணரும் சக்தி உண்டு. வண்ணங்களை வித்தியாசப்படுத்தி அறியும் திறன் குறைவு. உடலை சுத்தமாக பேண, அவ்வபோது நாக்கால் நக்கிக் கொள்ளும். தினமும், 14 மணி நேரம் வரை துாங்கும்.இதன் பற்கள் வளையும் தன்மை கொண்டவை. பிடித்தவற்றை கவ்வியபடி, எடுத்துச் செல்லும். முன்காலில் ஐந்து விரல், பின்காலில் நான்கு என, மொத்தம், 18 விரல்கள் இருக்கும். அபூர்வமாக காலுக்கு எட்டு வீதம், 32 விரல்களையும் சில பூனைகள் கொண்டிருக்கும். மணிக்கு, 48 கி.மீ., வேகத்தில் ஓடும் திறனுள்ளது. அதே வேகத்தில், குறைந்த துாரமே ஓட இயலும்.மனித உடலில், 206 எலும்புகள் உள்ளன; பூனைக்கு, 244 உள்ளன. பூனைக்கு ஏழு ஜென்மம் எனக் கூறுவர். உடனே, ஏழு முறை பிறக்கும் என எண்ண வேண்டாம். அது, எவ்வளவு உயரத்தில் இருந்து விழுந்தாலும் காயம் படாமல் தப்பிவிடும். இதைத் தான் ஏழு பிறவி எனக் கூறுகின்றனர்.-ராஜிராதா