சல்யூட் பெறுவதா, சல்யூட் அடிப்பதா?
மத்திய அமைச்சரவையில் உள்ள இளம் மந்திரிகளில், தனித்து நிற்பவர், பாராட்டப்படுகிறவர் சச்சின் பைலட். ராணுவப் படையின் ஒரு அதிகாரியாக நியமனம் பெறும் முதல் மத்திய மந்திரி சச்சின் பைலட். இவரது ரேங்க் லெப்டினென்ட். மந்திரி என்ற வகையில், ராணுவ அதிகாரிகள் இவருக்கு சல்யூட் அடிக்க வேண்டும். ஆனால், லெப்டினென்ட் ரேங்க் அதிகாரியாக இவர், உயர் அதிகாரிகளுக்கு சல்யூட் அடிக்க வேண்டும். நிலைமையை எப்படி சமாளிப்பது? சச்சின் பைலட் சாதாரண உடையில் இருக்கும்போது ராணுவ அதிகாரிகள் அவருக்கு சல்யூட் அடிக்க வேண்டும், சச்சின் பைலட் மிலிடரி யூனிபார்மில் இருக்கும்போது, உயர் அதிகாரிகளுக்கு அவர் சல்யூட் அடிப்பார் என்று முடிவு செய்யப்பட்டது.சச்சின் பைலட்டின் தந்தை ராஜேஷ் பைலட்டும், தாத்தாவும் ராணுவத்தில் பணி புரிந்திருக் கின்றனர். ராணுவத்தில் சேர வேண்டும் என்பது என்னுடைய கனவு என்கிறார் சச்சின். சில வி.ஐ.பி.,க்கள் ராணுவம் மற்றும் விமானப்படையில் கவுரவ அதிகாரிகளாக சேருகின்றனர். நடிகர் மோகன்லால், கபில் தேவ் போல! ஆனால், சச்சின் பைலட், ராணுவத்தில் சேருவதற்குரிய தேர்வுகள் எழுதி உடல் ரீதியாகவும், மருத்துவ ரீதியாகவும் பரிசோதனைகளிலும் தேர்ச்சி பெற்றவர்.— ஜோல்னா பையன்.