எதிர் இருக்கையில் அமர்ந்து பாருங்கள்!
ஓட்டுனர் உரிமம் பெற வேண்டிய வயதில், உரிமம் பெற்று, கார் ஓட்டி பழகியவன் நான். வாகனம் ஓட்டுவதில், மிகுந்த அனுபவம் உண்டு. என் விபத்தில்லா பயணம், இன்றளவும் தொடர்கிறது.என் நிறைந்த அனுபவத்தை வைத்து, விபத்தில்லா பயணத்திற்கென ஒன்றை மட்டும் வாகன ஓட்டிகளுக்கு, சொல்லி வைக்கிறேன்...'சில நேரங்களில், சாலையில் நம் எதிர் வாகனத்தில் இருப்பவர் வழி விடுவாரா... நம்மை போகவிட்டு, பின், அவர் போவாரா, நாம் முதலிலா, அவர் முதலிலா, நம்மை அவர் முந்துவாரா, நாம் முந்தலாமா...' என்பது போன்ற கேள்விகள் எழுந்து, மன போராட்டங்களாய் மாறும்.இதில், நன்கு யோசித்து முடிவெடுக்கிறவர் அல்லது எதிராளி எடுத்த தவறான முடிவை சரி செய்யும் விதமாக வாகனத்தை ஓட்டுகிறவரே புத்திசாலி.சாலைகளை பொறுத்தவரை, எதிராளி என்ன முடிவை எடுப்பார் என்பதை சுலபமாக கணிக்க, எளிய வழி ஒன்று இருக்கிறது... இது, நான் கடைப்பிடிப்பது...விக்ரமாதித்தன் கூடுவிட்டு, கூடு பாய்வான் என்பரே... அந்த பாணியில், என் இருக்கையிலிருந்து மானசீகமாக எழுந்து, என்னைச் சுற்றி வாகனம் ஓட்டுவோரின் இருக்கையில் போய் அமர்ந்து விடுவேன்.என்ன உளறுகிறீர்கள் என்போருக்கு ஒரு வார்த்தை... நாம் அந்த இருக்கையில் இருந்தால், என்ன முடிவு எடுப்போம் என்று சிந்திப்பதையே, இப்படி இடம் மாறி அமர்வதாக சொல்கிறேன்.இப்படி, கற்பனையில் பறந்து, எதிர் இருக்கையில் அமர்ந்து பார்த்தால், முடிவு அபாரமாக இருக்கும். 'நிச்சயம் உனக்காக நான் காத்திருக்க மட்டேன்; நான் தான் முதலில்...' என்கிற முடிவிற்கு, எதிர் வாகன இருக்கைக்காரர் வருவார் என்பது, அவரது இருக்கைக்கே போனால் தான், புரியும்.ஒன்று சொல்லட்டுமா வாசகர்களே... இதை, என் ரத்த சொந்தங்கள், நண்பர்கள், வாசகர்கள், தொழிற் தொடர்பாளர்கள், வாடகைதாரர்கள், ஊழியர்கள், போட்டியாளர்கள் என, எல்லாருடைய எதிர் இருக்கைக்கும் பொருத்தி பார்த்து விட்டேன். அடேயப்பா... எவ்வளவு உண்மைகள் புரிய ஆரம்பித்தன தெரியுமா...அதுவரை, நான் செய்வது மட்டுமே நியாயம் என்று எண்ணிக் கொண்டிருந்த எனக்கு, அவர்கள் இருக்கையில் போய் அமர்ந்ததும், அவர்கள் செயல்பாடுகளில் இருந்த நியாயங்கள் புரிய ஆரம்பித்தன.என் பக்கம் தவறே இல்லை என்றிருந்த எனக்கு, அவர்கள் இருக்கையில் உட்கார்ந்தபடி, என் இருக்கையையும், என்னையும் பார்த்தேன்... என் பக்க தவறுகள், பளீரென்று பட்டன.நீங்களும் முயற்சி செய்து பாருங்களேன்!லேனா தமிழ்வாணன்