சில்லரை விலை பணவீக்கம் ஓராண்டில் இல்லாத சரிவு

புதுடில்லி:நுகர்வோர் விலை குறியீடு அடிப்படையிலான சில்லரை விலை பணவீக்க விகிதம், கடந்த ஓராண்டில் இல்லாத அளவுக்கு மே மாதம் 4.75 சதவீதமாக குறைந்துஉள்ளது. பணவீக்கம் 4 சதவீதத்துக்கு கீழே வந்தால் மட்டுமே, ரெப்போ வட்டி விகிதத்தை குறைப்பது குறித்து சிந்திக்கப்படும் என, சமீபத்தில் நடந்து முடிந்த ரிசர்வ் வங்கியின் பணக் கொள்கை குழு கூட்டத்தில், ரிசர்வ் வங்கி கவர்னர் சக்திகாந்த தாஸ் தெரிவித்து இருந்தார். அதன் அடிப்படையில் பார்க்கும்போது, தற்போதைக்கு வட்டி விகிதம் குறைக்கப்படாது என்றே தெரிகிறது. மே மாத பணவீக்கம் தொடர்பாக, தேசிய புள்ளியியல் அலுவலகம் தெரிவித்து உள்ளதாவது:கடந்த ஏப்ரல் மாதத்தில் 4.83 சதவீதமாக இருந்த சில்லரை விலை பணவீக்கம், மே மாதத்தில் 4.75 சதவீதமாக குறைந்துள்ளது. எனினும், இது கடந்தாண்டு மே மாதத்தின் 4.31 சதவீதத்துடன் ஒப்பிடுகையில், அதிகமாகும். கடந்த மாதம் சில சமையல் பொருட்களின் விலை சற்றே குறைந்ததை அடுத்து, பணவீக்கம் குறைந்துள்ளது. கடந்த ஏப்ரலில் உணவுப் பொருட்களின் பணவீக்கம் 8.70 சதவீதமாக இருந்த நிலையில், மே மாதம் 8.69 சதவீதமாக சற்றே குறைந்துள்ளது. இவ்வாறு தெரிவித்து உள்ளது.கடந்த பிப்ரவரி மாதம் முதலே பணவீக்கம் படிப்படியாக குறைந்து வருவது குறிப்பிடத்தக்கது. நடப்பு நிதியாண்டுக்கான நாட்டின் சில்லரை விலை பணவீக்கம் 4.50 சதவீதமாக இருக்கும் என, ரிசர்வ் வங்கி கணித்துள்ளது.

சில்லரை விலை பணவீக்கம்

மாதங்கள் சதவீதம்2023மே 4.31ஜூன் 4.87ஜூலை 7.44ஆகஸ்ட் 6.83செப்டம்பர் 5.02அக்டோபர் 4.87நவம்பர் 5.55டிசம்பர் 5.692024ஜனவரி 5.10பிப்ரவரி 5.09மார்ச் 4.85ஏப்ரல் 4.83மே 4.75

தொழில் துறை உற்பத்தி சரிவு

கடந்த ஏப்ரல் மாதத்தில் நாட்டின் தொழில் துறை உற்பத்தி வளர்ச்சி, மூன்று மாதங்களில் இல்லாத அளவுக்கு 5 சதவீதமாக குறைந்துள்ளது. கடந்த மார்ச் மாதத்தில் வளர்ச்சி 5.40 சதவீதமாக இருந்தது. எனினும், கடந்தாண்டு ஏப்ரல் மாதத்தின் 4.60 சதவீதத்துடன் ஒப்பிடுகையில், இது சற்றே அதிகமாகும். ஏப்ரல் மாதத்தில் மின் துறை 10.20 சதவீத வளர்ச்சியுடனும்; சுரங்கத்துறை 6.70 சதவீத வளர்ச்சியுடனும் சிறப்பான செயல்பாட்டை வெளிப்படுத்தின. எனினும், கடந்தாண்டு ஏப்ரல் மாதத்தில் 5.50 சதவீதமாக இருந்த தயாரிப்புத் துறையின் உற்பத்தி, நடப்பு ஏப்ரலில் 3.90 சதவீதமாக சரிந்துள்ளது.